ಮೂಲ : ಮೆರ್ಸಿ ಮಾರ್ಗರೇಟ್
ಕನ್ನಡಕ್ಕೆ : ರಾಮಕೃಷ್ಣ ಸುಗತ
ಈ ರಾತ್ರಿ
ನಿದ್ದೆ ಅದ್ಯಾವ ಗೂಬೆಯೊಂದರ ಕಾಲಕೆಳಗೆ
ಕೋಳಿಮರಿಯಂತೆ ಸಿಕ್ಕಿಕೊಂಡಿರುವುದೋ
ನಿಶ್ಚಲ ಮರಗಳಿಗೂ ಆತಂಕ
ಸೋರುವ ಕಪ್ಪುರಕ್ತವ ಕಂಡು
ಕತ್ತಲು ಕವಿಯುವ ವೇಳೆಯಲ್ಲವೇ
ನಡೆಸುತ್ತಿವೆ ರಣಹದ್ದುಗಳು ಸ್ವೇಚ್ಛಾಚಾರ
ಈ ರಾತ್ರಿ
ನಿದ್ದೆಯಿಲ್ಲ ದೆಹಲಿಗೆ
ನಿದ್ದೆಯಿಲ್ಲ ಕಾಶ್ಮೀರಕ್ಕೆ
ನಿದ್ದೆಯಿಲ್ಲ ಉತ್ತರಪ್ರದೇಶಕ್ಕೆ
ನಿದ್ದೆಯನ್ನೇ ತ್ಯಾಗಮಾಡಿ ಬಿಟ್ಟುಕೊಟ್ಟಿರುವಾಗ
ಇನ್ನೆಲ್ಲಿಯ ನಿದ್ದೆ ಮನುಷ್ಯತ್ವಕ್ಕೆ
ಈ ರಾತ್ರಿ
ಕೂಸು ಮಲಗಿಸಲು ಲಾಲಿ ಮರೆತಿದ್ದಾಳೆ ತಾಯಿಯೊಬ್ಬಳು
ಪ್ರೇಮಿಗಾಗಿ ಬಾಗಿಲಲ್ಲೇ ಕಾದು ನಿಂತಿದ್ದಾಳೆ ಪ್ರಿಯತಮೆಯೊಬ್ಬಳು
ಮಗನಿಗಾಗಿ ಪ್ರಾರ್ಥಿಸುವ ತಾಯಿ
ತಂದೆಗಾಗಿ ಕಾಯುತ್ತ ಬೀದಿಯಲ್ಲೇ ದೃಷ್ಟಿ ನೆಟ್ಟ ಮಕ್ಕಳು
ಎಲ್ಲಿ ಅವರೆಲ್ಲ ?
ಅಲ್ಲಲ್ಲಿ ತಮ್ಮ ಅಸ್ತಿತ್ವ ಹುಡುಕಿಹೋಗಿರುವ
ಅವರೆಲ್ಲ ಎಲ್ಲಿ ?
ಈ ರಾತ್ರಿ
ಹೀಗಾದರೆ ಎಷ್ಟು ಒಳ್ಳೆಯದು
ತಿರುಗಬಾರದೇ ದೆಹಲಿಯ ಬೀದಿಯಲ್ಲಿ
ಮಾತುಬಲ್ಲ ಯಾವುದಾದರೂ ಹಸುವೊಂದು
ಸಾಧುಪ್ರಾಣಿಯಲ್ಲವೇ
ಹೇಳಲಾರದೇ ಮಾರಣಹೋಮ ಸಾಕೆಂದು
ಈ ರಾತ್ರಿ ಮುಗಿದುಹೋದರೆ
ಬೇಡ ಈ ರಾತ್ರಿ ಮುಗಿಯುವುದು ಬೇಡ
ನಿದ್ದೆ ಕಳೆದುಕೊಂಡ ಅದೆಷ್ಟು ಕಣ್ಣುಗಳ
ರೋಧನೆ ಕೇಳಬೇಕಾಗುವುದೋ
ಗುಡಿ ಮಸೀದಿ ಚರ್ಚು
ಉಳಿಯಲಾರವು ಮನುಷ್ಯನಿಲ್ಲದೆ ಯಾವತ್ತೂ
ಗುಡಿ ಮಸೀದಿ ಚರ್ಚು
ಕೋರಲಾರವು ಮನುಷ್ಯರಕ್ತ ಯಾವತ್ತೂ
ಈ ರಾತ್ರಿ
ಕೊಲ್ಲುವಷ್ಟು ದ್ವೇಷ ಅವರಿಗಿದೆ
ಪ್ರೀತಿಸುವಷ್ಟು ಧೈರ್ಯ ನಮಗಿದೆ
Nice one