-ಪದ್ಮಲತಾ ಮೋಹನ್

ಆತ್ಮನಿರ್ಭರ

ಹೌದು!
ಈಗ ಆಕಾಶ ಮುಟ್ಟಬಹುದು
ನಂಬಿಕೆಯ ರೆಕ್ಕೆಗಳು ಹುಟ್ಟಿವೆ.
ಕಡಲಾದರು ದಾಟಬಹುದು
ಆತ್ಮವಿಶ್ವಾಸದ ಗರಿಗಳು ಮೂಡಿವೆ.
ಪರ್ವತವನ್ನು ಎದುರಿಸಿ ನಿಲ್ಲಬಹುದು
ಧೈರ್ಯದ ಕಸುವು ತುಂಬಿದೆ.
ಆದರೆ,
ಗಾಳಿಯಲಿ ತೇಲದೆ ನೆಲ ಹಿಡಿಯಬೇಕು
ನೀರಿನಲಿ ಮುಳುಗದೆ ಮೇಲೇಳಬೇಕು
ನೆಲದೊಳಗೆ ಹುದುಗದೆ ಬದುಕಬೇಕು
ನಮ್ಮ ಬದುಕಿನ ಓಟಕ್ಕೆ
ನಾವೇ ವೇಗವರ್ಧಕವಾಗಬೇಕು
ಕತ್ತಲ ದಾರಿಯಲಿ ನಾವೇ ಬೆಳಕಾಗಬೇಕು
ನೋವಿನ ಗಾಯಕ್ಕೆ
ನಾವೇ ಮುಲಾಮಾಗಬೇಕು.
ಇನ್ನಾದರೂ ಬಿಟ್ಟುಬಿಡೋಣ
ಯಾರೋ
ಹಾರಿಸುವ ಗಾಳಿಪಟವಾಗುವುದನ್ನು
ಗಾಳಕ್ಕೆ ಸಿಕ್ಕ ಮೀನಾಗುವುದನ್ನು
ಪರರ ಧ್ವನಿಯ ಹಾಡಾಗುವುದನ್ನು

ಬದಲಿಗೆ
ಹೆಜ್ಜೆ ನಮ್ಮದೇ, ದಾರಿ ರೂಪಿಸೋಣ
ಯಶಸ್ಸು ನಮ್ಮದೇ, ಗುರಿ ಮುಟ್ಟೋಣ
ಭವಿಷ್ಯದ ಭರವಸೆಯ
ಆತ್ಮನಿರ್ಭರ ಹೆಣ್ಣಾಗೋಣ !