-ಕೆ.ಎನ್.ಲಾವಣ್ಯ ಪ್ರಭಾ

ಹನಿಗವಿತೆಗಳು

1. ಮಾತುಗಳು ಅರ್ಥಹೀನ
   ಎಂದೆನಿಸುವುದು
   ಎದುರಿಗಿದ್ದವರನ್ನು
   ಅರಿಯದಿದ್ದಾಗಲಷ್ಟೇ
   ಮಾತುಗಳ ಹಂಗು
   ಎದೆಯಲ್ಲಿರುವವರಿಗೆ
   ಯಾಕೆ ಬೇಕು ಹೇಳಿ?
2. ನೋಡುವ ನೋಟ
   ದೃಷ್ಟಿಹೀನ ಎನಿಸುವುದು
   ಹೊರಗಣ್ಣಿಂದ
   ನೋಡುವಾಗಲಷ್ಟೇ
   ಒಳಗಣ್ಣಿನ ವಿಷಯ ಹಾಗಲ್ಲ
   ನೋಡಲು ಕಣ್ರೆಪ್ಪೆ
   ತೆರೆದೇ ಇರಬೇಕಾಗಿಲ್ಲ
3. ಕೆಲವೊಮ್ಮೆ ಸತ್ಯವೂ
   ಸುಳ್ಳಾಗಿಯೇ
   ಕಾಣುವುದು
   ಮನದ ಭ್ರಮೆಯ ಧೂಳು
   ಝಾಡಿಸಿ
   ತೆಗೆಯದಿದ್ದಾಗಲಷ್ಟೇ
   ನಂಬಿಕೆಯ ಕನ್ನಡಿ
   ಶುಭ್ರವಿರಿಸಿದರೆ ಸಾಕು
   ಸತ್ಯ ಸಂತೈಸಬಲ್ಲದು ನಿನ್ನ
4. ಸಂದೇಹ ಸಂಶಯ
   ಅನುಮಾನ
   ಯಾವುದೇ ಎದ್ದರೂ
   ಪ್ರೇಮದಲ್ಲಿ
   ಅದು ಸುನಾಮಿಯೇ
   ಕೊಚ್ಚಿ ಹಾಕಿ
   ಕೊನೆಗಾಣಿಸುವುದು
   ಪ್ರೇಮಿಗಳಿಬ್ಬರನ್ನೂ
   ಒಂದೇ ಒಂದು ಹನಿ ವಿಶ್ವಾಸ
   ನಂಬಿಕೆ ಕಾಳಜಿ ಮೂಡಿದರೆ
   ಪ್ರೇಮದ ಕಡಲು
   ಪೊರೆಯುತ್ತದೆ
   ಮುತ್ತು ರತ್ನ ಪಚ್ಚೆ ಹವಳ
   ಮೀನ ರಾಶಿ
   ಸಂಸಾರದೊಡಲನ್ನೇ
5. ಬೆಳಕು ಭ್ರಮೆ ಕತ್ತಲೆ ಸತ್ಯ
   ಎಂದು ಕನಲುವವರ
   ಮುಂದೆ
   ಸಾಲು ದೀಪ ಹಚ್ಚಿದರೇನು?
   ಬೆಳಕು ಕತ್ತಲು ಪರಸ್ಪರ
   ಸಂಗಾತಿಯಾಗಿಯೇ
   ಸಾಗುವ
   ಎದೆ ಬೆನ್ನು ಜೊತೆಯಾದ
   ದೇಹ ನಿಮ್ಮದಲ್ಲವೇನು?