ಸರೋಜಿನಿ ಪಡಸಲಗಿ

ಮುಂಜಾವಿನ ಮಂಜಿನಲಿ
ಮುಸ್ಸಂಜೆಯ ರಂಗಿನಲಿ
ಕಳೆದು ತೇಲಿ ಹೋಗುವಾಗ
ಬಾರದಿರು ಕನಸೇ ಓ ಕನಸೇ

ನೀನರಿಯದ ಗುಂಗಿನಲಿ
ಮಧುಮಧುರ ರಂಗಿನಲಿ
ನೆನಪುಗಳು ಸುಳೀವಾಗ
ಬಾರದಿರು ಕನಸೇ ಓ ಕನಸೇ

ಕಣ್ಣ ಎವೆಯ ತುಂಬಾ
ಹತ್ತು ಹಲವು ಸುಳಿದು ಓಡಿ
ಸೆಳೆದು ಹೆಣೆಯುವಾಗ
ಬಾರದಿರು ಕನಸೇ ಓ ಕನಸೇ

ಹರಿದಾಡುವ ಸೌಗಂಧ
ತುಳುಕಿ ಕುಲುಕಿ ಚೆಲ್ಲದಂತೆ
ಕಾಪಿಟ್ಟು ಕಾಯುವಾಗ
ಬಾರದಿರು ಕನಸೇ ಓ ಕನಸೇ

ನಿನಗಾಗಿಯೆ ಚಡಪಡಿಸಿ
ಗಳಿಗೆ ಬಿಡದೆ ಕಾತರಿಸಿ
ಆಸರೆಗೆ ಹಂಬಲಿಸಿ ಕೂಗಿ ಕರೆಯುವಾಗ
ತಪ್ಪಿಸದಿರು ಕನಸೇ ಓ ಕನಸೇ