ಅನಿಲ್ ಗುನ್ನಾಪೂರ

ನಾನು ಸುಮ್ಮನೆ ಮರಳುಗಾಡಿನಲ್ಲಿ ಮುತ್ತು
ಹುಡುಕುತ್ತಿದ್ದೇನೆ
ಸಮುದ್ರದ ಅರಿವೇ ಇಲ್ಲ
ಮುತ್ತು ಸಿಗುವುದೆಲ್ಲಿ ಎಂಬುದು ನನಗೂ ತಿಳಿದಿಲ್ಲ
ಗುಳಿಕೆನ್ನೆಯ ಮೇಲೆ ಅಧರಗಳಿರಿಸಿದ ಗುರುತು
ಆರದಂತೆ ಕಾಪಾಡಿಕೊಂಡಿರುವೆ
ಯಾರಿರಿಸಿರಬಹುದೆಂದು ಈವರೆಗೂ ಗೊತ್ತಾಗಿಲ್ಲ

ನಾನು ಸುಮ್ಮನೆ ಒಂಟಿಗಾಲಿನಲ್ಲಿ ನಿಂತು
ಕಾಯುತ್ತಿದ್ದೇನೆ
ಇನ್ನೊಂದು ಕಾಲೂರುವ ಪರಿವೇ ಇಲ್ಲ
ಯಾರಿಗಾಗಿ ಕಾದಿರುವೆ ಎಂಬುದು ನನಗೂ ತಿಳಿದಿಲ್ಲ
ಕಾಗದದ ಮೇಲೆ ಕಾಡಿದ ಸಾಲುಗಳ ಹೊರತು
ಮತ್ತೇನೂ ಓದಿಲ್ಲ
ಯಾರು ಬರೆದಿರಬಹುದೆಂದು ಈವರೆಗೂ ಗೊತ್ತಾಗಿಲ್ಲ

ನಾನು ಸುಮ್ಮನೆ ಹದಿಹರೆಯದ ತುಡಿತಗಳಿಗೆ
ತಡೆಬೇಲಿ ಹಾಕಿದ್ದೇನೆ
ಬೇಲಿದಾಟಿದ ಬಾಲೆಯ ನೆರಳೇ ಕಾಣುತ್ತಿಲ್ಲ
ನೆರಳುಬೆಳಕಿನಾಟದಲ್ಲಿ ಬೆತ್ತಲೆಯಾದ ಮನಕೆ
ನಾಚಿಕೆಯೇ ಇಲ್ಲ
ಕಾಡುವ ನಿನ್ನ ನೆನಪುಗಳ ಮರೆತು
ಸುಖವಾಗಿರುವುದು ಹೇಗೆಂದು ತಿಳಿಯುತ್ತಿಲ್ಲ