ರಂಜನಾ ಭಟ್

ಅಸಂಖ್ಯ ಖುಷಿಗಳು ಫಕ್ಕನೆ
ತೇಲಿ ಹೋಗಿವೆ ಗಾಳಿಯಲಿ
ಅದೆಷ್ಟೋ ದುಃಖಗಳು ಹೇಳದೆ ಮರೆಯಾಗಿವೆ ಮನದಲಿ
ಬರಿದಾಗಿದೆಯೇ ಭಾವಗಳ ಖಜಾನೆ?
ಊಹಿಸಲಾಗದೇ ಮುಂದಿನ ಯೋಜನೆ?…
ಗಿಜಿಗುಡುವ ಸಂತೆಯಲಿ ಕಳೆದುಹೋದ
ಪುಟಾಣಿ ಪಾದದ ಹುಡುಗಿಯಂತೆ ನಾನು
ವಿಳಾಸ ಹೇಳಲೂ ಬಾರದಷ್ಟು ಸಣ್ಣ ಬಾಲೆ
ಮೌನ ತಳೆದಿವೆ ತುದಿಯಿರದ ಪಟಪಟ ಮಾತುಗಳು
ಮುಚ್ಚಿಹೋಗಿವೆ ಮೊದಲಿನ ಅಚ್ಚರಿ ತುಂಬಿದ ಕಣ್ಣುಗಳು
ಸಂತೆಯ ತಿರುವಿನಲ್ಲೆಲ್ಲೋ ಕಳೆದುಹೋಗಿದೆ ಮುಗುಳ್ನಗು
ಹುಡುಕಿಕೊಡಬಹುದೇ ಕಳೆದುಹೋದ ಎಲ್ಲವನು ಯಾರಾದರೂ?

ಮರಳಿ ದೊರೆಯಬಹುದೇ ಹಳೆಯ ಎಲ್ಲ ನೆನಪುಗಳು?…
ಬಹುಶಃ ಹಿಂದೆ ಅತಿ ಭಾವುಕಳಾಗಿದ್ದೆನೇನೋ
ಈಗಲೂ ಭಾವುಕಳಾಗುತ್ತೇನೆ ಆಗೊಮ್ಮೆ ಈಗೊಮ್ಮೆ
ಆದರೆ ಪಟ್ಟಿಯ ಹಾಳೆ ಹರಿಯುವುದಿಲ್ಲ, ಅನಿಸಿದ್ದು ಗೀಚುವುದಿಲ್ಲ
ಅದೊಂಥರಾ ಹೇಳಲಾಗದ ಖಾಲಿ ಖಾಲಿ ಭಾವ
ಅನುಭವಗಳ, ಅನಿಸಿಕೆಗಳ ಅಕ್ಷರಕ್ಕಿಳಿಸಲಾಗದೇ….
ಇತ್ತೀಚೆಗೆ ಯಾಕೋ ಬರೆಯುವುದನ್ನೇ ನಿಲ್ಲಿಸಿಬಿಟ್ಟಿದ್ದೇನೆ ನಾನು !!