– ಟಿ ಎಸ್ ಗೊರವರ
ಪುಡಿಯಾಗಲಿ ನಮ್ಮಿಬ್ಬರ ನಡುವಿನ ಅಹಮ್ಮಿನ ಗೋಡೆ
ನನ್ನದೋ ನಿನ್ನದೋ ಗೊತ್ತಿಲ್ಲ ;
ಪ್ರಮಾದಗಳು ಘಟಿಸುವವು ದಿನ ಬೆಳಗಾದರೆ
ಪ್ರೀತಿಗಿಂತ ಪ್ರಮಾದಗಳೇ ಮಿಗಿಲೇನು?
ಈ ಮೌನ ಹಿತವಾಗಿತ್ತು ಮೊದ ಮೊದಲು
ಮೌನದೊಳಗೂ ಜಿನಗುತ್ತಿತ್ತು ಭರಪೂರ ಪ್ರೀತಿ
ನೀನು ಮಾತು ಬಿಟ್ಟ ಮರುದಿನದ ಮೌನ
ಕಡು ಬೇಸಿಗೆಯ ದಿನ ;
ಯಾತನೆಯಾಗಿ ತೊಯ್ಯುತಿವೆ ಕಣ್ಣುಗಳು
ಬೆಳೆಯೊಳಗೆ ಕಳೆಯೂ ಬೆಳೆಯುವುದು
ಮೊಸರೊಳಗೂ ಬೀಳುವುದು ಒಮ್ಮೊಮ್ಮೆ ಹರಳು
ಹಾಗಂತ ಬೆಳೆ, ಮೊಸರು ಬೀಸಾಕುವುದು ಸರಿಯೇನು?
ತೆಗೆಯಬೇಕು ಕಳೆ, ಹರಳು
ಸರಸದಲಿ ವಿರಸ ಹಣಿಕಿ ಹಾಕುವುದು ಆಗಾಗ
ಕ್ಷುಲ್ಲಕವದು ತುಂಬು ಪ್ರೇಮದಲಿ
ಹುಣ್ಣಿಮೆಯೂ ಇರಲಿ, ಅಮವಾಸೆಯೂ ಬರಲಿ
ಮಿಂದೇಳುವ ಪ್ರೇಮದಲಿ ನಮ್ಮ ಪಾಡಿಗೆ ನಾವು
ಬೆಳೆಯೊಳಗೆ ಕಳೆಯೂ ಬೆಳೆಯುವುದು
ಮೊಸರೊಳಗೂ ಬೀಳುವುದು ಒಮ್ಮೊಮ್ಮೆ ಹರಳು
ಹಾಗಂತ ಬೆಳೆ, ಮೊಸರು ಬೀಸಾಕುವುದು ಸರಿಯೇನು?
ತೆಗೆಯಬೇಕು ಕಳೆ, ಹರಳು
ತುಂಬ ಇಷ್ಟವಾದ ಸಾಲುಗಳು. ಕಾವ್ಯಯಾನ ಮುಂದುವರೆಯಲಿ.
nice..very nice