ರಾಜಾಬಕ್ಷ್ ಎಂ.ಬಿ

1

ಹೆಂಡತಿಯ ಕೈತಾಗಿ ಬುದ್ಧನ
ಮೂರ್ತಿ ನೆಲಕ್ಕೆ ಬಿದ್ದು ಚೂರಾಯಿತು.
ಸಿಟ್ಟಿಗೆದ್ದ ಗಂಡ,ಹೆಂಡತಿಯ ಕೆನ್ನೆಗೆ ಛಟೀರ್ ಅಂತ
ಬಾರಿಸಿದ್ದನ್ನ ಕಂಡ ಬುದ್ಧ, ‘ಶಾಂತಿ’ಯ ಕುರಿತಾದ
ತನ್ನ ಹೇಳಿಕೆಗಳ ಕುರಿತು ಮರುವಿಶ್ಲೇಷಣೆಗಿಳಿದ.

2

ಕಂಪೌಂಡ್ ನೆಗೆದೋಡಿ ಬೋಧಿವೃಕ್ಷದ ಕೆಳಗೆ
ಧೀರ್ಘ ಧ್ಯಾನಕ್ಕಿಳಿದ ಬುದ್ಧನ ಧೃಢತೆ ಮೆಚ್ಚಿದ ಬಾನ ಚಂದಿರ,
ಸೀದಾ ಬುಧ್ಧನ ಹೃದಯದಾಳದಲ್ಲಿ ತೇಲಿ ಬಂದ.
ಬೋಧಿವೃಕ್ಷದ ಎಲೆಎಲೆಗಳಲ್ಲಿ ನಕ್ಷತ್ರಗಳೆಲ್ಲ ಹೊಳೆಯತೊಡಗಿದವು.

3

‘ಬುದ್ಧಮಾರ್ಗ’ ಹಿಡಿಸುತ್ತಿದೆ ಎಂದು ಹೆಂಡತಿಗೆ
ಹೇಳಿದಾಗಿನಿಂದಲೂ ರಾತ್ರಿಗಳಲ್ಲಿ ಗಟ್ಟಿಯಾಗಿ
ತಬ್ಬಿಕೊಂಡು ಮಲಗುತ್ತಾಳೆ.

4
ಎತ್ತರಕ್ಕೇರಿದ ಗಾಳಿಪಟವೊಂದು
ಮೋಡಗಳೊಂದಿಗೆ ಹಾದರಕ್ಕಿಳಿದಿದ್ದನ್ನ
ಸಹಿಸದ ಸತ್ಯಶೀಲ ‘ದಾರ’ ಬಂಧ ಕಡಿದುಕೊಂಡಿತು.

ಎತ್ತರಕ್ಕೆರುವುದೆಂದರೆ ಎಲ್ಲವನ್ನೂ ಮೀರುವುದಲ್ಲ.

5

ತೊಟ್ಟಿಲಲ್ಲಿ ಮಲಗಿದ್ದ ಕೂಸು
ತನ್ನ ತಾಯಿಯ ಬಳೆ ಸದ್ಧನ್ನೇ ಧೇನಿಸುತ್ತಿತ್ತು.
ಪೂರ್ಣಪ್ರಮಾಣದ ಧ್ಯಾನಕ್ಕೆ ಇದಕ್ಕಿಂತ ಬೇರೆ
ಉದಾಹರಣೆ ಸಿಗಲಿಕ್ಕಿಲ್ಲ!!.