ಮಲ್ಲಿಗೆ

‘ನಿನಗೆ ಹೇಳಲೆಂದೇ
ನನ್ನ ಕೈಗಡಿಯಾರ ಲೆಕ್ಕ ಇಡುತ್ತಿದೆ ನೋಡು’
ಎಂದು ನಡೆದ ಹೆಜ್ಜೆಗಳ ಲೆಕ್ಕವನ್ನೂ…
ಬಿಡದೆ ಕೊಟ್ಟವ ನೀನು.

ಪ್ರತಿ ಉಸಿರನ್ನೂ ಎಣಿಸೆಣಿಸಿ
‘ಇಷ್ಟು ಸಲ ನೆನಪಿಸಿದೆ’
ಎನ್ನುವಾಗ ಉಸಿರೇ ಆಗಿ
ನನ್ನೊಳು ಸೇರಿ ಹೋದವ ನೀನು.

‘ಕೊನೆಯ ತುತ್ತು ನನ್ನದೇ ಇರಲಿ ಎಂದು’
ತುತ್ತ ಕೈಗೆತ್ತಿಕೊಂಡಾಗಲೂ
ನೆನಪಿಸುವವ ನೀನು.

‘ನನ್ನ ಮರೆತೇ ಬಿಡುವಿಯಾದರೆ
ಚಂದದೊಂದು ಸುಳ್ಳಾದರೂ ಹೇಳಲು ಕಲಿ
ಹಾಗಾದರೂ ಬದುಕುವೆ’
ಅಂದವ ನೀನು

ಇಂಥವನ ಕುರಿತೇ.. ಹರಕು ಬಾಯಿಯ
ಲೋಕ ಮಾತಾಡಿತು
ನನಗೆ ಕಾಳಜಿಯ ಕಥೆ ಹೇಳಿತು.

ಗೊತ್ತಾ ನಿನಗೆ?
ಹಾಗೇ ಮಾತಾಡಿಕೊಂಡವರು
ಅರ್ಧ ನಿನ್ನ ಹಿಂದೆ ಬಿದ್ದವರು
ಇನ್ನರ್ಧ ನನ್ನ ಹಿಂದೆ!

ನಮ್ಮಿಬ್ಬರನ್ನೂ.. ಮರೆತು ಜಗತ್ತೀಗ
ಸಾವಿನ ಕುರಿತೇ ಚಿಂತಿಸುತ್ತಿದೆ
ನಾವು ಮಾತ್ರ ಪ್ರೇಮವನ್ನೇ. ಉಸಿರಾಡೋಣ
ನಾಳೆಯೂ ಬದುಕಿರಲು