ವಿಶ್ವ ರಂಗ ಭೂಮಿ ದಿನಾಚರಣೆ ಅಂಗವಾಗಿ ಆಶಯ ನುಡಿ ಕಾವ್ಯ…
ನಾರಾಯಣ ರಾಯಚೂರ್
ರಂಗ ಬಾಂಧವರೆಲ್ಲ
ಒಂದಾಗಿ ಹಾಡೋಣ
ಛಂದಾದ ರಂಗ ಕಲೆ
‘ರಂಗ ಭೂಮಿ’-ಎಂದು.
ಆನಂದದಾ ಸೆಲೆ
‘ರಂಗ ಭೂಮಿ’-ಎಂದು.
ಭೂಮಿ-ತೂಕದ ಅಭಿವ್ಯಕ್ತಿ
‘ರಂಗ-ಭೂಮಿ’-ಎಂದು.
ಅಂದು,ಇಂದು
ಎಂದು -ಮುಂದೂ
ರಂಗಕ್ಕೆ ಇಲ್ಲ -ಕುಂದು!
ನಾಟಕವು ನಿಲ್ಲದೆಂದೂ!!
ಭರತ, ಭಾಸ-ಕವಿ
ಕಾಳಿದಾಸ ಭವಭೂತಿ
ಬ್ರೆಕ್ಟ್, ಷೇಕ್ಸ್ ಪಿಯರ್
ಇಬ್ಸನ್ ವಿಲಾಯತಿ.,
ಪೂರ್ವ- ಪಶ್ಚಿಮ
ಭಿನ್ನ,ಭಿನ್ನ ಸಂಸ್ಕೃತಿ
ವಿನಿಮಯದ ಮೂಲಕ
ಸಮ್ಮಿಲನ, ಸ್ವೀಕೃತಿ.
ಬಣ್ಣ -ಬಿನ್ನಾಣಗಳ
‘ಕಣ್ಣ-ಯಜ್ಞ’ ವೆ ರಂಗ,
ಭಾವ ರಸ-ಯಾನ
ಅವಿಭಾಜ್ಯ ಅಂಗ.
ಜಗವೆ ನಾಟಕ-ರಂಗ
ಜೀವಿಗಳೇ ಪಾತ್ರ;
ದೇಶ ಕಾಲೈಕ್ಯಗಳ
ಸಮೃದ್ಧ ಗಾತ್ರ.
ದಿನ-ವಿದ್ಯಮಾನಗಳೆ
ಅನುಪಮ ‘ಪ್ರಸಂಗ’ಗಳು
ಸಾಕ್ಷಿ-ಭಾವದ ಪ್ರೇಕ್ಷಕನೇ
ಕಂಗಳು….
ನಾಟಕದ ನೋಟಕನೇ
ಬೆಳದಿಂಗಳು…
ನೋವು-ನಲಿವುಗಳೆಲ್ಲ,
ಸೋಲು-ಗೆಲವುಗಳೆಲ್ಲ,
ಕಾಲ-ಕಾಲಕ್ಕೆ
ಅಭಿವ್ಯಕ್ತಿಗೊಂಡು,
ಅರಿವಿನೆಚ್ಚರ ಮೂಡಿ
ರಂಗ-ಕಲೆ ಕೊಂಡಾಡಿ
ಭಂಗವಾಗದ ಶಕ್ತಿ
ಕಂಡು ಕೊಂಡು-
ಸಾಗುತ್ತಿರಲಿ -‘ರಂಗ’
ಪ್ರಬಲಗೊಂಡು.
SHOW MUST GO ON…..
ಜಯ, ಜಯಾ
ಜಯ ವಿಶ್ವ ರಂಗ;
ದಿಗ್ವಿಜಯಾಭ್ಯುದಯಾ
ವಿಶ್ವ ರಂಗ
0 ಪ್ರತಿಕ್ರಿಯೆಗಳು