ಗರ್ಭ ಕೂಗಿನ ಋತುಗಾನ
ರಘುನಂದನ ಹೆಗಡೆ, ಯಲ್ಲಾಪುರ
ಸ್ವಪ್ನ ಸಂತೆಯ ಬೀದಿಯಲ್ಲಿ
ದ್ವೀಪದೂರಿನ ರಾಜಕುಮಾರ
ಎದೆಯ ತುಡಿತದ ಬಿಗುವಲ್ಲಿ
ಕುದುರೆ ಖುರಪುಟದ ನಾದ
ದೇಹದೊಡಲ ಬಯಕೆ ವಸಂತಗಾನ
ಹೊಕ್ಕುಳ ಸುಳಿಯ ತಿರುವಲ್ಲಿ
ಹೊಸ ಹರೆಯ ಹೂ ಕಂಪನ
ಅಂತರಾಳದಾಸೆ ಪಟಪಟಿಸಲು
ಹಸಿ ನೆಲದ ಕನಸಿಗೂ ಹಸಿವು
ರೆಕ್ಕೆ ಬಿಚ್ಚಿ ಹರೆಯ ತೆರೆಯಲು
ಮೌನ ರಾಗದ ಬಯಕೆ ಬಿಸುಪು
ಕೊರಳ ಕೊಳಲಿಗೆ ತುಟಿ ಸೋಕಿ
ಸ್ವಪ್ನಲೋಕದ ತುಂಬ ಪಿಸುಮಾತು
ಬಯಕೆ ಹೂ ಗಂಧ; ಸುಡುವ ಬೆಳದಿಂಗಳು
ಚಿಟ್ಟೆ ರೆಕ್ಕೆ ಬಿಚ್ಚುವ ಬೆರಗು
ಎದೆ ಮೊಳಕೆಯೊಡೆವ ಪುಳಕ
ಹರೆಯ ಕುಡಿಯೊಡೆವ ದುಗುಡ
ಚೈತ್ರ ಚಿಗುರಿನ ಸಂಭ್ರಮ
ಮೊದ ಮೊದಲ ಮೊಗ್ಗು ಬಿರಿದಂತೆ
ಗರ್ಭ ಕೂಗಿನ ಋತುಗಾನ
ತಾಯ ತೊಟ್ಟಿಲ ಸಂಕಲನ
0 Comments