ಲಡಾಯಿ ಬಸೂ
1
ಮುಸ್ಸಂಜೆ ದೀಪ ಹಚ್ಚಿದ್ದೆ
ಚಂದಿರನೂ ಮೂಡಿದ್ದ
ಮೆಲ್ಲಗೆ ಬೀಸುವ ತಂಪುಗಾಳಿಯಲಿ
ತೇಲಿ ಬಂದ
ಮಿಂಚುಹುಳು
ಸುಮ್ಮನೆ ಯಾವುದೊ ನೆನಪು ಬೆಳಕಾಯಿತು
2
ಮುಂಜಾವಿನ ಮೃದು ಮಂಜು
ಸಂಜೆಯ ಒದ್ದೆ ಮೋಡ
ಇರುಳ ಮುಳ್ಳಮೊನೆ ಮೇಲೆ ಕುಳಿತಿವೆ
ನನ್ನೆದೆಯ ನೆನಪಿನ ಆವರಣವನ್ನೆಲ್ಲ
ತೀಡಿ ಗಾಳಿಗೂಡಿವೆ
ಸಾಧ್ಯವಾದಲ್ಲಿ ನೀನು ಹಿಡಿ
ಬೆಕ್ಕಿನ ವಿಷಾದ ಕಣ್ಣಿಗಷ್ಟು ತಲುಪಿಸು
3
ಬೀಗ ಜಡಿದ ಷರಾಬು ಅಂಗಡಿ
ಒಡೆದು ಚೂರಾದ ಮಧುಬಟ್ಟಲು
ಅವನ ಹೆಜ್ಜೆಗುರುತಿನ ಸಾಕ್ಷಿ
ಇನ್ನೂ ಉಳಿದುಕೊಂಡಿದ್ದವು
ನಿಂತರೇನು ಬಹಳ ಹೊತ್ತು ಅಲ್ಲಿ..
ಚೂರಿಬಿದ್ದ ಕೋಳಿಯ ಕೊರಕೊರ
ಸದ್ದು ನಿಧಾನ ಇರುಳಲ್ಲಿ ಕರಗುವುದು
4
ಹುಟ್ಟು ಸಾವಿನ ನಡುವೆ
ಹಗಲು ರಾತ್ರಿಗಳು
ಮಧ್ಯದಲ್ಲಿ ಸಿಲುಕಿದಂತ
ಬೆಳಕಿನ ಹಸಿ ನೆನಪೊಂದನ್ನು
ಜರೂರಾಗಿ ಕಳಿಸು
ಹೊದ್ದು ಮಲಗಬೇಕಿದೆ
5
ಪ್ರತಿ ದಿನವೂ ಸಾಯುತ್ತೇನೆ ನಿನಗಾಗಿ
ಪ್ರತಿ ದಿನವೂ ಹುಟ್ಟುತ್ತೇನೆ ನಿನಗಾಗಿ
ಸಾಯದೆ ಹುಟ್ಟದೆ ನಿನ್ನ ಕೂಡಲು ನನಗೆ ಬರದು
6
ಅರಿಯಲು ಏನೋ ಇದೆಯೆಂದೇ ಭೂಮಿ ತಿರುಗುತ್ತಿದೆ
ಅರಿಯಲು ಏನೋ ಇದೆಯೆಂದೇ ನದಿ ಹರಿಯುತ್ತಿದೆ
ಅರಿಯಲು ಏನೂ ಇಲ್ಲವೆಂದು ಎಲೆಗಳು ಉದುರುತ್ತಿವೆ
7
ಅವರು ಕಾಗದದ ತುಣುಕಿನಲ್ಲಿ
ಕನಸಿನ ತಂಬಾಕು ಸುತ್ತಿದರು
ಮಾಲಕನ ಸಿಗರೇಟಿನ ಜಾಹಿರಾತಿನಲಿ
ಸೇದುವವರ ತುಟಿಗಳು ರಂಗಾಗಿದ್ದವು
ಅವರು ಸಿಗರೇಟಿನ ಜುರುಕಿ ಎಳೆದಾಗಲೆಲ್ಲ
ಕಟ್ಟಿದವರ ತುಟಿ ಕಪ್ಪಾಗುತ್ತಿದ್ದವು
ಚಂದದ ಬರಹ
super sir… thank you….
ಚೆನ್ನಾಗಿದೆ ಸರ್