ಭಾಸ್ಕರ್ ಬಂಗೇರ

ಊರು ಬದಲಾಗಿದೆ ಗೆಳತಿ
ವಾರ ವ್ರತಗಳಿಗೆ ಮೀನು ಬಿಟ್ಟ ಜನ
ನಾಮ ಬಳಿದುಕೊಂಡ ದೋಣಿಗಳು
ಸೇತುವೆ ಕೆಳಗಡೆ ಕಣ್ಣೀರು.

ಅಕ್ವೇರಿಯಮ್ಮಿನಲ್ಲಿ ಅಳುವ ವಾಸ್ತು ಮೀನು
ಅಂಗಳಕ್ಕೆ ಹಾಕಿದ ಕಾಂಕ್ರೀಟು
ಬೊಂಬಾಯಿಯ ಅಣ್ಣ ತಂದ ವಾಸ್ತು ಗಿಡ
ಜಗಳಕ್ಕೆ ಬೆಳೆದ ಕಾಂಪೌಂಡು.

ಜಾತ್ರೆಯಲ್ಲಿ ನೂರರ ನೋಟಿಗೆ ಸಿಗುವ ನಗುವ ಬುದ್ಧ
ನಡುಮನೆಯಲ್ಲಿ ಜಗಳ ತೋರಿಸುವ ಟೀವಿ
ಅಂಗಳದಲ್ಲಿ ವೀಡಿಯೊ ಗೇಮ್ ಆಡುವ ಮಕ್ಕಳು
ಅಜ್ಜಿ ಜೊತೆ ಸತ್ತ ಶೋಭಾನೆ ಹಾಡು.

ಮದುವೆ ಮನೆಯಲ್ಲಿ ತಟ್ಟೆ ಹಿಡಿದು ನಿಂತ ಭಿಕ್ಷುಕರು
ಮಾರಾಟವಾಗದೇ ಉಳಿದ ಬಾಳೆ ಎಲೆ
ಜೋಡು ರಸ್ತೆಯ ಹಣೆಗೆ ಶ್ರದ್ಧಾಂಜಲಿ ಫ್ಲೆಕ್ಸು
ಸತ್ತವರ ಮನೆಯಲ್ಲಿ RIP ಗಳ ರಾಶಿ
ಊರು ಬದಲಾಗಿದೆ ಗೆಳತಿ.