ರೇವಣಸಿದ್ದಪ್ಪ ಜಿ ಆರ್

ನಾನೊಂದು ಅಂಕೆ;
ನೀನೊಂದು ಅಂಕೆ;
ಅವನೂ, ಅವಳೂ, ಅದೂ, ಅವರೂ
ಒಂದೊಂದು ಅಂಕೆಯೇ.
ಯಾವ ಅಂಕೆಯೂ ಚಿಕ್ಕದಲ್ಲ;
ಯಾವ ಅಂಕೆಯೂ ದೊಡ್ಡದಲ್ಲ.
ಸಣ್ಣದೆನಿಸಿಕೊಂಡ ಸೊನ್ನೆ
ಬ್ರಹ್ಮಾಂಡವನೆ ವ್ಯಾಪಿಸಿದೆ;
ದೊಡ್ಡದೆನಿಸಿಕೊಳ್ಳುವುದರ
ಮುಖಾಮುಖಿಯಾಗಲು
ಇನ್ನೊಂದು ಸಿದ್ಧವಾಗುತ್ತದೆ.

ಈ ಲೆಕ್ಕವೊಂದು
ಅಂಕೆಗಳ ಆಟ;
ಆಟವಾಡುವುದೇ
ಅವುಗಳ ಪರಿಪಾಟ.
ಕೂಡಿಸಿದರೆ
ಕೂಡುತ್ತಾ ಹೋಗುತ್ತದೆ;
ಕಳೆದಷ್ಟೂ
ಉಳಿಯತೊಡಗುತ್ತದೆ;
ಕೂಡಿಸಿ ಕಳೆದರೆ
ನಿಶ್ಯೇಷವಾಗಬೇಕಲ್ಲ,
ಹಾಗಾಗುವುದೇ ಇಲ್ಲ!
ಗುಣಿಸಿದರೆ
ಕಗ್ಗಂಟಾಗುತ್ತದೆ;
ಭಾಗಿಸಲು ಹೋದರೆ
ಭಾಗವಾಗುವುದೇ ಇಲ್ಲ.
ಬಡ್ಡಿಗೆ ಬಡ್ಡಿ
ಸೇರುತ್ತದೆ;
ಚಕ್ರಬಡ್ಡಿಯ ಚಕ್ರ
ಓಡುತ್ತಾ ಸಾಗುತ್ತದೆ.
ಲಸಾಅಗಳಾವೂ ಇಲ್ಲ;
ಮಸಾಅಗಳೇ ಎಲ್ಲ!

ಈ ಲೆಕ್ಕ
ಕೆಲವರಿಗೆ ಸರಳ;
ಇನ್ನು ಕೆಲವರಿಗೆ ಸರಾಸರಿ;
ಹಲವರಿಗೆ ಕಠಿಣಾತಿಕಠಿಣ.
ಸಹವಾಸ ಸಾಕೆಂದು
ಕೈಚೆಲ್ಲುವಂತಿಲ್ಲ;
ಯಾರದೋ ಕಣ್ ಪಾಯಿಂಟಿನಲ್ಲಿ
ಪರೀಕ್ಷೆ ಬರೆಯುತ್ತಿದ್ದೇವೆ ನಾವೆಲ್ಲ.