ಚುಕ್ಕಿ ಇಟ್ಟುಬಿಡು

ವೈಶಾಲಿ ಹೆಗ್ಡೆ

ಚುಕ್ಕಿ ಇಟ್ಟುಬಿಡು

ಒಂದರ ಪಕ್ಕ ಇನ್ನೊಂದು

ಸಾಲಾಗಿ

ಸಾಲು ಸಾಲಾಗಿ

ರಂಗೋಲಿಯ ಗೆರೆಗಳ ಲೆಕ್ಕ ತಪ್ಪುವವು

ಬಿಗಿದಿಡುವ ಚುಕ್ಕಿ ಇಲ್ಲದಿರೆ

ಸಣ್ಣಹುಡಿಯ ಹರಳು ಅತ್ತಿತ್ತಲಾದೀತು

ಉಸಿರ ಗಾಳಿಯೇ ಸಾಕು

ಗೆರೆ ಪೂರ ಡೊಂಕು

ಮತ್ತೆ ನೇರ ಕೂಡಿಸಲೊಂದು ಚುಕ್ಕಿಯೇಬೇಕು ಅದೋ ಆ ತುದಿಯಲ್ಲಿ

ಉಸಿರು ಬಿಗಿ ಹಿಡಿದುಕೊ

ಹೆಬ್ಬೆರಳ ಬದಿಯಿಂದ ತೋರುಬೆರಳ ನಡುವಿನ ಕಣಿವೆಯಲಿ

ಸಪೂರ ಜಾರಬೇಕದು

ಅಳತೆ ತಪ್ಪದಂತೆ ಉದುರಬೇಕು

ಗುಪ್ಪೆಯಾಗದಂತೆ ಎಳೆ ಬೀಳಬೇಕು

ಚುಕ್ಕಿ ಚುಕ್ಕಿಯ ಹೆಣಿಕೆಯಲಿ ಹೊಕ್ಕು ಹೊರಡುವ ಗೆರೆಗೆಲ್ಲೂ ಮೋಹಬೇಡ

ಮೆತ್ತಗೆ ಸವರುತ್ತ ಸಾಗಬೇಕಷ್ಟೇ

ಎಲ್ಲ ಕೊಡಿಸಿಡುವ ಕಾಯಕದ ಹಿಂದಿಂದ

ಚುಕ್ಕಿಯ ಕುರುಹು

ಮರೆಯಾದೀತು

ಆದರೆ ಇರುವಿಕೆಯಲ್ಲ