ಸೌಜನ್ಯ ನಾಯಕ

ಅದೆನೋ ಮಾದಕತೆ ಇದೆ
ಕಾಡಿಗೆ ಸಿಂಗರಿಸಿದ
ಆ ನಿನ್ನ‌ ಕಂಗಳಲಿ
ಇಲ್ಲವಾದರೆ ನಾನೇಕೆ
ಪದೇ ಪದೇ ಸಿಲುಕುತಿದ್ದೆ ಹೇಳು
ದೂರದಿಂದಲೇ ಮೋಹಿಸುವ
ಆ‌ ನಿನ್ನ ಕಣ್ಗಳಲಿ

ಬಹುದೂರದಿಂದಲೇ ನಸುನಕ್ಕು
ಮೌನದೊಡನೆ ಮಾತನಾಡುವ
ಹುಡುಗಿಯಿರಬೇಕು ನೀನು
ಇಲ್ಲವಾದರೆ ಆಲಿಸದೆ ಇರುತಿದ್ದವೇ
ನನ್ನ ಕಿವಿಗಳು
ಪಿಸುಗುಡುವ ಆ ನಿನ್ನ ದನಿಯನ್ನು

ಅದೆಂತಹ ನಾಚಿಕೆ ನಿನಗೆ
ಸಮೀಪಿಸುತಲೇ
ನನ್ನ ಕಣ್ತಪ್ಪಿಸಿ
ಮಾಯವಾಗುವ ಮಟ್ಟಿಗೆ
ಇಲ್ಲವಾದರೆ
ನನ್ನ ಕಣ್ಣಗಳು
ನಿನ್ನ ಮುಗ್ದತೆಯನು
ಹಿಂಬಾಲಿಸದೆ ಇರುತಿದ್ದವೇ ಹೇಳು

ಅದೆಷ್ಟು ಕಾಡಿಸುವೆ
ದೂರದಿಂದಲೇ ನೀ ನನ್ನ
ನಿಜ ಹೇಳಬೇಕೆಂದರೆ
ಅನುಭವಿಸುವಾಸೆಯಾಗಿದೆ ನನಗೂ
ಸಲಿಗೆ ತುಂಬಿದ ನಿನ್ನ ಸನಿಹವನ್ನ

ಆದರೆ ಅದೆಕೋ
ಈ ಪ್ರೇಮಿಯ ಪಾಡು
ನಿನ್ನ ಕಂಗಳಲಿ ಸೆರೆಯಾದಂತಿಲ್ಲ
ಕಾಡಿಗೆಯ ಕಣ್ಗಳು
ದೂರದಿಂದಲೇ ಕಾಡುತಿವೆಯೆ
ಹೊರತು
ಹತ್ತಿರ ಸುಳಿಯುತಿಲ್ಲ…

ಪಿಸುಗುಡುವ ನಿನ್ನ ಮಾತುಗಳು
ಮೌನ ಮುರಿದು
ನನ್ನ ಕಿವಿಯ ತಲುಪುತಲೇ ಇಲ್ಲ…
ನಿನ್ನ ಇರುವಿಕೆಯ ಅರಿತು
ಹುಡುಕಾಡಿದ ಜಾಗಗಳಲಿ
ನೀ ಇದ್ದು ಹೋ
ಕುರುಹಿದೆಯೇ ಹೊರತು
ನೀನಿಲ್ಲ…

ಕೆಲವೊಮ್ಮೆ ಕಂಗಾಲಾಗುವೆ ನಾ
ನೈಜತೆಯ ಹುಡುಕಲಾಗದೆ
ಭಾಸವಾದವುಗಳೊಡನೆಯೆ
ಭಾವ ಬೆಸೆದು ಬದುಕುತಿರುವೆ
ನಾನೊಬ್ಬ
ಭಗ್ನ ಪ್ರೇಮಿಯೆಂಬುದ ಒಪ್ಪಲಾಗದೆ…