–ಸರೋಜಿನಿ ಪಡಸಲಗಿ

ಒಪ್ಪವಾಗಿರಿಸಬೇಕಿದೆ !!

ಬಾರದಿರಿ ಕನಸುಗಳೆ ಸುಳಿಯದಿರಿ
ಯೋಚನೆಗಳೆ
ಕಳೆದುಹೋಗಿಹೆ ರಂಗಿನ ನೆನಪುಗಳ
ಸಂತೆಯಲಿ
ಬಾಚಿಕೊಳ್ಳ ಬೇಕಿದೆ ನುಣುಚಿ ಜಾರುವ
ಮೊದಲು
ಒಂದು ಚಣ ಸುಮ್ಮನಿರಿ ಕಾಡದಿರಿ ಎನ್ನ
ಕಾಡದಿರಿ ಎನ್ನ

ಮುಂಬೆಳಗಿನ ಚೆಂಬೆಳಕು ಮುಂಬಾಗಿಲ
ಅಂಗಳದಿ
ಹೊನ್ನೀರಹರಿಸಿ ಪಸರಿಸಿಹ ಹಸಿರಿನ ಹಸೆ
ಕೆಂಪಾಗದಂತೆ
ಚಿಗುರು ಹೂ ಬಳ್ಳಿಗಳ ಮೊಗ್ಗಿನ ಎಸಳು
ಚಿತ್ತಾರದಲಿ
ನೆನಪುಗಳ ನವ ಸಿಂಗಾರ ಮಿರುಗಬೇಕಿದೆ
ಕಾಡದಿರಿ ಎನ್ನ

ಮುಂಜಾವಿನ ಮಂಜಿನ್ಹನಿಯ ಮುತ್ತಿನ
ಕಾಂತಿಯಲಿ
ಅರಳಿದ ಮುಗುಳಿನ ನಸುನಗೆ ಛಾಯೆ
ಮಸೆಸಿ
ಹೊಸ ದಿನದ ಹೊನಲಲಿ ಮಿನುಗೊ ತಾರೆ
ಬೊಟ್ಟನಿಟ್ಟಂತೆ
ನೆನಪುಗಳ ಕುಸುರಿ ನಕ್ಷೆ ಹೆಣೆಯಬೇಕಿದೆ
ಕಾಡದಿರಿ ಎನ್ನ

ಬಾಳ ಪಯಣ ದಾರಿಯಲ್ಲಿ ಅಲುಗಿ
ನಲುಗದಂತೆ
ಮುಚ್ಚಟೆಯ ತೆಕ್ಕೆಯಲಿ ಜೋಕೆಯಲಿ
ಕಾಪಿಟ್ಟ
ನನ್ನೆದೆಯ ವೀಣೆ ಅನುಗಾಲ ಜೀವ ರಾಗ
ಮೀಟುವಂತೆ
ನೆನಪುಗಳ ತಾನ ತಂತಿ ಒಪ್ಪವಾಗಿರಿಸಬೇಕಿದೆ
ಕಾಡದಿರಿ ಎನ್ನ !!