ಉರ್ದು ಮೂಲ: ಫೈಜ್ ಅಹಮದ್ ಫೈಜ್

ಕನ್ನಡಕ್ಕೆ: ಎಸ್. ಸಿರಾಜ್ ಅಹಮದ್

ಈ ಕವಿತೆಗೆ ಪ್ಯಾಲಿಸ್ತೀನ್ ನ ಮಕ್ಕಳು ರಚಿಸಿದ ಚಿತ್ರಗಳನ್ನು ಬಳಸಲಾಗಿದೆ. ಮಕ್ಕಳು ರಚಿಸಿದ ಚಿತ್ರಗಳನ್ನು ಪ್ರದರ್ಶಿಸುವ ವಿರುದ್ಧ ನಿಷೇಧ ಹೇರಲಾಗಿತ್ತು.

ಅಳಬೇಡ ಕಂದಾ

ನಿನ್ನ ಅಮ್ಮನಿಗೆ ಅತ್ತೂ ಅತ್ತೂ ಈಗ ತಾನೇ ಸಣ್ಣದೊಂದು  ಜೊoಪು 

ಹಿಡಿದಿದೆ

ಅಳಬೇಡ ಕಂದಾ

ನಿನ್ನ ಅಪ್ಪನಿಗೆ ಈಗ ತಾನೇ ನೋವುಗಳಿಂದ ಮುಕ್ತಿ ಸಿಕ್ಕಿದೆ

ಅಳಬಾರದು ಮಗುವೇ

ನಿನ್ನ ತಮ್ಮ ಈಗ ತಾನೇ ಕನಸಿನಲ್ಲಿ ಹಿಡಿದ ಚಿಟ್ಟೆಗಳನ್ನು ಹುಡುಕಿಕೊಂಡು ಇನ್ನೊಂದು ದೇಶಕ್ಕೆ ಕಾಲಿಟ್ಟಿದ್ದಾನೆ

ಅಳಬೇಡ ಕಣೋ

ನಿನ್ನ ದೊಡ್ಡಕ್ಕನ ಮದುವೆ ಮೆರವಣಿಗೆಯ ಪಲ್ಲಕ್ಕಿ ಈಗ ತಾನೇ ಗಂಡಿನ ಮನೆ ತಲುಪಿದೆ

ಅಳಬಾರದು ಕಂದಾ

ಅವರೆಲ್ಲ ಮನೆಯಂಗಳದಲ್ಲಿ ಇವಾಗ ಸೂರ್ಯನ ಶವಕ್ಕೆ ಸ್ನಾನ ಮಾಡಿಸಿ

ಚಂದ್ರನನ್ನು ಹೂಳಲು ಗುಣಿ ತೋಡಿ ಹೋಗಿದ್ದಾರೆ

ಅಳಬಾರದಪ್ಪಾ

ಅಮ್ಮ ಅಪ್ಪ , ಅಕ್ಕತಮ್ಮ  ಸೂರ್ಯಚಂದ್ರ

ನಿನ್ನ ನೋಡಿದರೆ ಇನ್ನಷ್ಟು ಅಳಿಸಿಬಿಡುತ್ತಾರೆ 

ನೀ ನಕ್ಕರೆ

ಅವರೆಲ್ಲ ಒಂದಲ್ಲ ಒಂದು ದಿನ ಇನ್ನಾವುದೋ ವೇಷದಲ್ಲಿ

ನಿನ್ನ ಜೊತೆ ಆಡಲು ಬಂದೇ ಬರುತ್ತಾರೆ