ಚಂದ್ರಪ್ರಭಾ
ಈ ಪಾದಗಳನ್ನು ನಾನು ಪ್ರೀತಿಸುತ್ತೇನೆ
ಯಾಕೆಂದರೆ ಅವು ಆಯುಷ್ಯ ಪೂರ್ತಿ
ನನ್ನ ಭಾರ ಹೊತ್ತಿವೆ
ಈ ಪಾದಗಳನ್ನು ನಾನು ಚುಂಬಿಸುತ್ತೇನೆ
ಯಾಕೆಂದರೆ ಅವು ಕಲ್ಲು ಮುಳ್ಳು
ಗಾಜಿನ ದಾರಿಯಲ್ಲಿ ಸಹನೆಯಿಂದ ನಡೆದಿವೆ
ಈ ಪಾದಗಳನ್ನು ನಾನು ಆದರಿಸುತ್ತೇನೆ
ಯಾಕೆಂದರೆ ಕೈಗಳಂತೆ ಎಲ್ಲೆಂದರಲ್ಲಿ ಅಪ್ಪಳಿಸದೇ
ಚಪ್ಪಲಿ ಬೂಟು ಮೆಟ್ಟು ಮತ್ತೊಂದು
ಎಲ್ಲವನ್ನೂ ಘನತೆಯಿಂದ ಸ್ವೀಕರಿಸಿವೆ
ಈ ಪಾದಗಳಿಗೆ ನಾನು ಎಂದೆಂದೂ ಋಣಿಯಾಗಿದ್ದೇನೆ
ಯಾಕೆಂದರೆ ದಿಕ್ಕೆಟ್ಟು ಮನಸ್ಸು
ಬೀದಿ ಬೀದಿ ಅಲೆಯುವಾಗ ನಿಶ್ಯಬ್ದವಾಗಿ
ಅವು ಮನೆಯತ್ತ ಹೆಜ್ಜೆ ಹಾಕಿವೆ
ಈ ಪಾದಗಳನ್ನು ನಾನು ಮಡಿಲಲ್ಲಿಟ್ಟು ತಟ್ಟುತ್ತೇನೆ
ಯಾಕೆಂದರೆ ಋತು ಬದಲಾದರೂ ಬಿಸಿಲು
ಮಳೆ ಗಾಳಿ ಚಳಿ ಬಾಧಿಸಿದರೂ ಗೊಣಗದೇ
ಬೇಸರಿಸದೇ ವಿರಾಮ ಬಯಸದೇ
ತಮ್ಮ ಕಾಯಕದಲ್ಲಿ ಬದ್ಧತೆ ಉಳಿಸಿಕೊಂಡಿವೆ
ನಗರದ ನಟ್ಟ ನಡುವಿನ ಚೌಕದ
ಒಳ ಚರಂಡಿ ಉಸಿರುಗಟ್ಟಿ
ಜನಜಂಗುಳಿ ಮೂಗು ಮುಚ್ಚಿ ಪರದಾಡುವಾಗ
ಇವೇ ಪಾದಗಳು
ಮಲೆತ ನೀರಿನಲ್ಲಿ ತಲೆಗೂದಲು
ತೊಯ್ದು ತಪ್ಪಡಿಸಿದ ದೇಹ ಹೊತ್ತು
ನಿರ್ವಿಕಾರ ಭಾವದಲ್ಲಿ ಹೂಳೆತ್ತಿವೆ
ಈ ಪಾದಗಳನ್ನು ನಾನು
ಉಪ್ಪು ಅರಿಶಿಣ ಬೆರೆಸಿದ ಹದವಾದ
ಬಿಸಿ ನೀರಿನಲ್ಲಿ ನೆನೆಯಲು ಬಿಡುತ್ತೇನೆ
ರಕ್ತ ಒಸರುವ ಪಾದಗಳನ್ನು
ಮೃದುವಾಗಿ ನೇವರಿಸಿ ಮುಲಾಮು ಸವರುತ್ತೇನೆ
ಅವುಗಳ ಬಿರುಕಿನಲ್ಲಿ ಕರಗಿದ ಬೆಚ್ಚನೆ
ಮೇಣ ತುಂಬಿ ಅವುಗಳಿಗೆ
ಉಲನ್ನಿನ ಮೆತ್ತನೆ ಕಾಲ್ಗವಸು ತೊಡಿಸುತ್ತೇನೆ
ಪಾದುಕೆಗಳಿಗೆ ಬದಲಾಗಿ
ಎದೆಯ ಜಗುಲಿಯ ಮೇಲೆ ನಾನು
ಈ ಪಾದಗಳನ್ನು ಪ್ರತಿಷ್ಠಾಪಿಸುತ್ತೇನೆ…
0 ಪ್ರತಿಕ್ರಿಯೆಗಳು