ಮಾಲತಿ ಭಟ್

ಇನ್ನಾದರೂ
ಮಾತು
ಕೊಡಬೇಕಾಗಿದೆ..!
 
ತಿಂಗಳುಗಟ್ಟಲೆ ಮನೆಯಿಂದ ಹೊರಗುಳಿದ
ಹಾಲು ಕಾಯಿಸುವ ಬೋಗುಣಿಗೆ ಮರಳಿ
ಅಡುಗೆಮನೆ ಪ್ರವೇಶಿಸುವ ಮಹಾಯೋಗ;
ಒಲೆಯ ಗದ್ದುಗೆಯೇರಿ ಸದ್ದು ಮಾಡುವ
ಸಂಭ್ರಮದ ಸ್ವಪ್ನ..!

ಅದೊಂದು ದಿನ ಎಚ್ಚರ ತಪ್ಪಿದ
ಬೋಗುಣಿಗೆ ತಿಳಿಯಲೇ ಇಲ್ಲ,
ತನ್ನೊಡಲೊಳಗಿನ ಹಾಲಿನ ಪ್ರಮಾಣ.!
ಉರಿ ಹಚ್ಚಿಸಿಕೊಂಡು ಕೊತಕೊತನೇ
ಕುದಿದು ಹಾಲುಕ್ಕಿಸುವ ಗೋಜಿಗೂ ಹೋಗಲಿಲ್ಲ;
ಉಸುರಲಿಲ್ಲ,ಚೂರೇ ಚೂರು ಶಬ್ಧವನ್ನು ಕೂಡ!
ಕಾಯುತ್ತಲೇ ಇತ್ತು,ಕುದಿಯುತ್ತಲೇ ಇತ್ತು,
ಕಾದು ಕರ್ರಗಾಗಿ ತಳ ಹಿಡಿದು
ಕಮಟು ವಾಸನೆ ಬರುವವರೆಗು..!
 
ಹಾಲು ಗಟ್ಟಿಗೊಂಡು ಚರಟ ಹಿಡಿದದ್ದು
ನೆನಪಾದಾಗ,ಬೋಗುಣಿಗು ಅವ್ಯಕ್ತ ಭಾವಗಳಿದ್ದದ್ದು
ಪಕ್ಕಾ ಆಗುತ್ತದಾದರೂ ಈಗ ಮತ್ತೆ
ಜಡ ಬೋಗುಣಿಗು ಬಂದಿದೆ ಒಲೆಯೊಡತಿಯ ಪಟ್ಟ;
ಅವಳೀಗ ಅಡುಗೆಮನೆಯ
ಫಳ-ಫಳಗುಡುವ ಸುರಸುಂದರಿ..!
 
ಇನ್ನಾದರೂ ಮಾತು
ಕೊಡಬೇಕಾಗಿದೆ,ಬೇಕು ಬೇಡ ಎಲ್ಲಎಲ್ಲದಕ್ಕೂ
ಕಿವಿಗೊಡುವ ಸಖಿಯಾಗುತ್ತೇನೆಂದು;
ನಿಗಾ ವಹಿಸಲೂಬೇಕಾಗಿದೆ,
ಇನ್ನೊಮ್ಮೆ ಅಂತರಂಗವೇ ಸೀದು ಹೋಗದಂತೆ..!