ನೂತನ ಸರ್ಕಾರದ ಆದ್ಯತೆಗಳೇನು ?

ನಾ ದಿವಾಕರ

ಬಹುತೇಕ ಒಂದು ದಶಕದ ನಂತರ ಕರ್ನಾಟಕದಲ್ಲಿ ಅಧಿಕಾರ ವಹಿಸಿಕೊಂಡಿರುವ ಕಾಂಗ್ರೆಸ್ ಪಕ್ಷಕ್ಕೆ ಈ ಬಾರಿ ಚುನಾವಣೆಗಳಲ್ಲಿ ಸದಾ ರಾಜಕೀಯವಾಗಿ ತಟಸ್ಥ ನೀತಿ ತಳೆಯುತ್ತಿದ್ದ ಕರ್ನಾಟಕದ ಹಲವು ಪ್ರಗತಿಪರ ಬುದ್ಧಿಜೀವಿಗಳೂ ಬೆಂಬಲ ವ್ಯಕ್ತಪಡಿಸಿದ್ದು ವಿಶಿಷ್ಟ ವಿದ್ಯಮಾನ. ಇದಕ್ಕೆ ಕಾರಣಗಳೂ ಹಲವು. ಹೇಗಾದರೂ ಮಾಡಿ ಬಿಜೆಪಿ ಸರ್ಕಾರ ಮತ್ತೆ ರಚನೆಯಾಗಕೂಡದು ಎಂಬ ಒಂದು ಧೋರಣೆ ಮತ್ತು ಸಂಭಾವ್ಯ ಮುಖ್ಯಮಂತ್ರಿಯಾಗಿ ಸಿದ್ಧರಾಮಯ್ಯನವರನ್ನು ಕಾಂಗ್ರೆಸ್ ಆಯ್ಕೆ ಮಾಡಿದ್ದುದರಿಂದ ಹಿಂದುಳಿದ ವರ್ಗಗಳ ಸಬಲೀಕರಣದತ್ತ ಇದೊಂದು ದಿಟ್ಟ ಹೆಜ್ಜೆ ಎಂಬ ಭ್ರಮೆ. ಸಿದ್ಧರಾಮಯ್ಯ ಪ್ರಮಾಣ ವಚನ ಸ್ವೀಕರಿಸಿದ ನಂತರದಲ್ಲಿ ರಾಜ್ಯದ ರಾಜಕೀಯ, ಸಾಮಾಜಿಕ ಮತ್ತು ಸಾಂಸ್ಕೃತಿಕ ವಲಯಗಳಲ್ಲಿ, ಮಾಧ್ಯಮಗಳ ಮೂಲಕ ವ್ಯಕ್ತವಾಗುತ್ತಿರುವ ಅಭಿಪ್ರಾಯಗಳನ್ನು ನೋಡಿದರೆ ಈ ರಾಜ್ಯದ ಜನತೆ ಮತ್ತು ವಿಶೇಷವಾಗಿ ಅಹಿಂದ ಸಮುದಾಯಗಳನ್ನು ಪ್ರತಿನಿಧಿಸುವ ಸಂಘಟನೆಗಳು ಕಾಂಗ್ರೆಸ್ ಸರ್ಕಾರದ ಮೇಲೆ ಅಪಾರ ವಿಶ್ವಾಸ, ನಂಬಿಕೆ ಇರಿಸಿರುವುದು ಸ್ಪಷ್ಟವಾಗುತ್ತದೆ.

ಈ ನಂಬಿಕೆಗಳ ವಿಸ್ತಾರ, ವಿನ್ಯಾಸ, ಆಶಯ ಮತ್ತು ಧೋರಣೆಗಳೂ ಜನಸಮುದಾಯಗಳಷ್ಟೇ ವಿಭಿನ್ನ. ದಲಿತ ಸಮುದಾಯಗಳಲ್ಲಿ ಎಡ-ಬಲಗಳ ನಡುವಿನ ಸಂಘರ್ಷದ ಹಿನ್ನೆಲೆಯಲ್ಲಿ ಒಂದು ತಾತ್ವಿಕ ನಿಲುವು ಸರ್ಕಾರದ ವತಿಯಿಂದ ಅಪೇಕ್ಷಿಸಬಹುದು ಎಂದು ನಂಬಲಾಗುತ್ತಿದೆ. ಅಲ್ಪಸಂಖ್ಯಾತ ಸಮುದಾಯಗಳು ಕಳೆದ ಏಳು ವರ್ಷಗಳ ಕೋಮುವಾದಿ ಆಳ್ವಿಕೆಯಿಂದ ಮುಕ್ತಿ ಹೊಂದಿ ತಮ್ಮ ಮೇಲಿನ ಆಕ್ರಮಣಗಳು ನಿಯಂತ್ರಿಸಲ್ಪಡುತ್ತಿವೆ ಎಂದು ನಿರೀಕ್ಷಿಸುತ್ತಿವೆ. ಹಿಂದುಳಿದ ವರ್ಗಗಳು ತಮ್ಮ ಆರ್ಥಿಕ ಅಭಿವೃದ್ಧಿ ಮತ್ತು ಸಾಮಾಜಿಕ ಸಬಲೀಕರಣಕ್ಕೆ ಸಿದ್ಧರಾಮಯ್ಯನವರ ಸರ್ಕಾರ ಸಕ್ರಿಯವಾದ ಕ್ರಮ ಕೈಗೊಳ್ಳುತ್ತದೆ ಎಂಬ ಆಶಾಭಾವನೆ ಹೊಂದಿವೆ. ರಾಜ್ಯದ ಕೃಷಿಕರು ಯಡಿಯೂರಪ್ಪ ಮತ್ತು ಇತರ ಸರ್ಕಾರಗಳ ಕೃಷಿ ಬಜೆಟ್ನಿಂದ ಏನೂ ಪಡೆಯಲಾಗದೆ ತಮ್ಮ ಬೆಳೆಗಳಿಗೆ ಸೂಕ್ತ ಬೆಂಬಲ ಬೆಲೆ ಮತ್ತು ಲಾಭದಾಯಕ ಮಾರುಕಟ್ಟೆಯನ್ನು ನಿರೀಕ್ಷಿಸುತ್ತಿದ್ದಾರೆ. ಶೈಕ್ಷಣಿಕ ವಲಯದಲ್ಲಿ ಅಮೂಲಾಗ್ರ ಬದಲಾವಣೆ ಮಾಡುವ ಮೂಲಕ ನೂತನ ಕಾಂಗ್ರೆಸ್ ಸರ್ಕಾರ ಶಿಕ್ಷಣದ ವಾಣಿಜ್ಯೀಕರಣವನ್ನು ತಡೆಗಟ್ಟುತ್ತದೆ ಎಂಬ ಆಶಾಭಾವನೆ ಜನಸಾಮಾನ್ಯರಲ್ಲಿ ಮೂಡಿದೆ.

ಆದರೆ ಅಧಿಕಾರ ವಹಿಸಿಕೊಂಡ ಮರುಕ್ಷಣವೇ ಮಾನ್ಯ ಮುಖ್ಯಮಂತ್ರಿಗಳು ಮಾಡಿದ ಘೋಷಣೆಗಳನ್ನು ನೋಡಿದರೆ ನೂತನ ಕಾಂಗ್ರೆಸ್ ಸರ್ಕಾರ ತನ್ನ ಆದ್ಯತೆಗಳನ್ನು ಸಮರ್ಥವಾಗಿ ಪರಿಶೀಲಿಸಿಲ್ಲ ಎಂದು ಕಾಣುತ್ತದೆ. ಯಾವುದೇ ರಾಜ್ಯದ ಅಧಿಕಾರ ವಹಿಸಿಕೊಳ್ಳುವ ಮುಖ್ಯಮಂತ್ರಿಗಳು ಪ್ರತಿನಿಧಿಸುವುದು ಸಾರ್ವಭೌಮ ಪ್ರಜೆಗಳನ್ನೇ ಹೊರತು ಆಡಳಿತಾರೂಢ ಪಕ್ಷವನ್ನಲ್ಲ. ಪಕ್ಷ ರಾಜಕಾರಣ ಅಧಿಕಾರ ಗ್ರಹಣದೊಂದಿಗೇ ಮುಕ್ತಾಯಗೊಂಡಲ್ಲಿ ಮಾತ್ರ ಸಮರ್ಥವಾದ, ಪ್ರಾಮಾಣಿಕವಾದ ಪ್ರಜಾತಂತ್ರ ವ್ಯವಸ್ಥೆ ನೆಲೆಯೂರಲು ಸಾಧ್ಯ. ತಮ್ಮ ಚುನಾವಣಾ ಪ್ರಚಾರದ ಸಂದರ್ಭದಲ್ಲಿ ಕಾಂಗ್ರೆಸ್ ಪಕ್ಷದ ನಾಯಕರು, ಸಿದ್ಧರಾಮಯ್ಯನವರನ್ನೂ ಸೇರಿದಂತೆ, ರಾಜ್ಯದ ಬೊಕ್ಕಸ ಬರಿದಾಗಿದೆ, ಬಿಜೆಪಿ ಸರ್ಕಾರ ಬೊಕ್ಕಸದ ಹಣವನ್ನು ಮಠಮಾನ್ಯಗಳಿಗೆ ಹರಿದು ಹಂಚಿದೆ, ಅಭಿವೃದ್ಧಿಗಾಗಿ ರಾಜ್ಯದಲ್ಲಿ ಹಣಕಾಸಿನ ಕೊರತೆ ಇದೆ, ಕೇಂದ್ರ ಯೋಜನೆಗಳ ಅನುದಾನಗಳನ್ನು ಸಮರ್ಥವಾಗಿ ಬಳಸಿಕೊಂಡಿಲ್ಲ ಎಂದೆಲ್ಲಾ ಆರೋಪಿಸಿತ್ತು. ಆದರೆ ಪ್ರಮಾಣವಚನ ಸ್ವೀಕರಿಸಿದ ಕ್ಷಣಾರ್ಧದಲ್ಲೇ ಮಾನ್ಯ ಮುಖ್ಯಮಂತ್ರಿಗಳು ಅಲ್ಪಸಂಖ್ಯಾತ ನಿಗಮ, ಅಂಬೇಡ್ಕರ್ ನಿಗಮ ಮತ್ತು ಹಿಂದುಳಿದ ವರ್ಗಗಳ ನಿಗಮದಿಂದ ನೀಡಿದ ಸಾಲಗಳನ್ನು ಸಂಪೂರ್ಣ ಮನ್ನಾ ಮಾಡುವುದಾಗಿ ಘೋಷಿಸಿರುವುದು, ಬಜೆಟ್ ಮಂಡಿಸುವ ಮುನ್ನವೇ 87 ಲಕ್ಷ ಬಿಪಿಎಲ್ ಕುಟುಂಬಗಳಿಗೆ ಕಿಲೋಗೆ ಒಂದು ರೂನಂತೆ ಅಕ್ಕಿ ನೀಡುವುದು ಮುಂತಾದ ಭರವಸೆ ನೀಡಿರುವುದು ಸಮರ್ಥ ಆಡಳಿತದ ಲಕ್ಷಣವಾಗಲಾರದು.

ಬಿಜೆಪಿ ಸರ್ಕಾರದ ಆಳ್ವಿಕೆಯಲ್ಲಿ ಸಾಮಾಜಿಕ ಮತ್ತು ಸಾಂಸ್ಕೃತಿಕ ಕ್ಷೇತ್ರಗಳಲ್ಲಿ ಸಂಭವಿಸಿರುವ ಅನಾಹುತಗಳು ಹಲವಾರು. ಮತೀಯ ಶಕ್ತಿಗಳ ಸಬಲೀಕರಣ, ಕೋಮುವಾದಿಗಳ ಅಟ್ಟಹಾಸ, ಶಿಕ್ಷಣ ಕ್ಷೇತ್ರದ ಕೇಸರೀಕರಣ, ಔದ್ಯಮಿಕ ಕ್ಷೇತ್ರವನ್ನು ಕಾರ್ಪೋರೇಟ್ ಶಕ್ತಿಗಳಿಗೆ ಒಪ್ಪಿಸಿರುವುದು, ನೈಸರ್ಗಿಕ ಸಂಪನ್ಮೂಲಗಳ ಲೂಟಿ, ಬಹು ಅಮೂಲ್ಯ ಗಣಿ ಉದ್ಯಮದ ಲೂಟಿ, ಕ್ರೈಸ್ತ ಮತ್ತು ಮುಸ್ಲಿಂ ಸಮುದಾಯಗಳ ಮೇಲೆ ಅವ್ಯಾಹತ ಆಕ್ರಮಣ ಹೀಗೆ ಅಕ್ರಮಗಳ ಪಟ್ಟಿ ಬೆಳೆಯುತ್ತಲೇ ಹೋಗುತ್ತದೆ. ಇದರಲ್ಲಿ ಅಚ್ಚರಿಯೇನಿಲ್ಲ. ಬಿಜೆಪಿ ಸರ್ಕಾರದಿಂದ ಇವೆಲ್ಲವೂ ನಿರೀಕ್ಷಿತವೇ ಆಗಿರುತ್ತದೆ. ಹಾಗಾಗಿ ಕಾಂಗ್ರೆಸ್ ಸರ್ಕಾರ ಈ ನೀತಿಗಳಿಂದ ಭಿನ್ನವಾಗಿದ್ದಲ್ಲಿ ಮಾತ್ರ ರಾಜ್ಯದ ಜನತೆಯ ಅಪೇಕ್ಷೆ, ಆದ್ಯತೆ ಮತ್ತು ಆಯ್ಕೆ ಸಾರ್ಥಕ ಎನಿಸಿಕೊಳ್ಳುತ್ತದೆ. ಈ ನಿಟ್ಟಿನಲ್ಲಿ ನೋಡಿದಾಗ ಉಡುಪಿ ಮಠ ಮತ್ತು ಗೋಕರ್ಣ ದೇವಾಲಯದ ವಿವಾದವನ್ನು ಬಗೆಹರಿಸುವ ನಿಟ್ಟಿನಲ್ಲೂ ಸಿದ್ಧರಾಮಯ್ಯ ಕೊಂಚ ವಿವೇಚನೆಯಿಂದ, ಗಂಭೀರವಾಗಿ ಯೋಚಿಸಿ ನಿರ್ಧಾರ ಕೈಗೊಳ್ಳುವುದು ಒಳಿತು. ಉಡುಪಿ ಮತ್ತು ಗೋಕರ್ಣ ದೇವಾಲಯಗಳನ್ನು ಸರ್ಕಾರದ ವಶಕ್ಕೆ ತೆಗೆದುಕೊಳ್ಳುವುದು ಸಮರ್ಥನೀಯ ನಿರ್ಧಾರವೇ ಆದರೂ ಇಂತಹ ಸೂಕ್ಷ್ಮ ವಿಚಾರಗಳಲ್ಲಿ ಆತುರದ ನಿರ್ಣಯ ತಾಳುವುದು ಸ್ವಾಗತಾರ್ಹವಲ್ಲ

ಸಾಮಾಜಿಕ ನ್ಯಾಯ, ಸೆಕ್ಯುಲರಿಸಂ ಮತ್ತು ಆರ್ಥಿಕ ಸಬಲೀಕರಣ ನೀತಿಗಳು ಒಂದು ವಿವೇಕಯುತ ನಿಟ್ಟಿನಲ್ಲಿ ಸಾಗಿದಾಗ ಮಾತ್ರ ಸಮಾಜದಲ್ಲಿ ಸೌಹಾರ್ದಯುತ ವಾತಾವರಣ ನಿರ್ಮಿಸಲು ಸಾಧ್ಯ. ಈ ನಿಟ್ಟಿನಲ್ಲಿ ಸಿದ್ಧರಾಮಯ್ಯ ನೇತೃತ್ವದ ಕಾಂಗ್ರೆಸ್ ಸರ್ಕಾರದ ಮುಂದೆ ಹಲವು ಆದ್ಯತೆಗಳು ಇರಬೇಕಾಗುತ್ತದೆ. ರಾಜ್ಯದ ನೈಸರ್ಗಿಕ ಸಂಪನ್ಮೂಲಗಳ ಲೂಟಿಯನ್ನು ತಡೆಗಟ್ಟುವುದು, ಅಕ್ರಮ ಗಣಿಗಾರಿಕೆಯನ್ನು ನಿಲ್ಲಿಸಿ ತಪ್ಪಿತಸ್ಥರಿಗೆ ಶಿಕ್ಷೆ ನೀಡುವುದು, ಶಿಕ್ಷಣ ಕ್ಷೇತ್ರದ ಕೇಸರೀಕರಣ ಮತ್ತು ವಾಣಿಜ್ಯೀಕರಣ ಪ್ರಕ್ರಿಯೆಯನ್ನು ತಡೆಗಟ್ಟುವುದು, ಕೋಮುವಾದಿ ಸಂಘಟನೆಗಳನ್ನು ನಿಯಂತ್ರಿಸುವುದು, ರಾಜ್ಯದಲ್ಲಿ ಬೇರೂರಿರುವ ಕೋಮು ದ್ವೇಷ ಮನೋಭಾವವನ್ನು ಹೊಡೆದೋಡಿಸಲು ಯತ್ನಿಸುವುದು, ಮಾತೃಭಾಷೆಯಲ್ಲಿ ಪ್ರಾಥಮಿಕ ಶಿಕ್ಷಣ ನೀಡುವ ಬಗ್ಗೆ ಸಕಾರಾತ್ಮಕ ನೀತಿ ಜಾರಿಗೊಳಿಸುವುದು, ಉತ್ತರ ಕರ್ನಾಟಕದ ಹಲವು ಸಮಸ್ಯೆಗಳಿಗೆ ಸ್ಪಂದಿಸುವುದು, ಪ್ರಾದೇಶಿಕ ಅಸಮತೋಲನವನ್ನು ಸರಿಪಡಿಸುವುದು, ಆಪರೇಷನ್ ಕಮಲದಂತಹ ಭ್ರಷ್ಟ ರಾಜಕಾರಣಕ್ಕೆ ತಡೆಹಾಕುವುದು, ರಾಜಕೀಯ ವಲಯದಲ್ಲಿ ಮತ್ತು ಆಡಳಿತ ವ್ಯವಸ್ಥೆಯಲ್ಲಿ ಬಲವಾಗಿ ಬೇರೂರಿರುವ ಭ್ರಷ್ಟಾಚಾರವನ್ನು ನಿಯಂತ್ರಿಸುವುದು, ಲೋಕಾಯುಕ್ತವನ್ನು ಬಲಪಡಿಸುವುದು ಇವೇ ಮುಂತಾದ ಆದ್ಯತೆಗಳು ಸಿದ್ಧರಾಮಯ್ಯನವರ ಮುಂದಿದೆ. ಈ ನಿಟ್ಟಿನಲ್ಲಿ ಸಕಾರಾತ್ಮಕವಾಗಿ ಮುಂದುವರೆದರೆ ಮಾತ್ರ ಜನತೆ ಬಯಸಿದ ಬದಲಾವಣೆ ಕಾಣುತ್ತದೆ. ಇಲ್ಲವಾದಲ್ಲಿ ಹಳೆಯ ಬಾಟಲಿಯಲ್ಲಿ ಹೊಸ ನೀರು ಎಂಬಂತಾಗುತ್ತದೆ.