ಹಾಡು
ಶರದ ಸೌಕೂರ
ನಸುಕು ಹರಿಯುವ ಮೊದಲು
ಕತ್ತಲ ಪೊದೆಯೊಳಗಿಂದ
ಏನು ಕೇಳುತ್ತದೆ ಈ ಪುಟಾಣಿಹಕ್ಕಿ
ಮತ್ತೆ ಮತ್ತೆ?
ಕೆಲವೊಮ್ಮೆ ಧಾಟಿ ಬದಲಿಸಿ
ಮತ್ತೇನನ್ನೋ ಉಲಿಯುತ್ತದೆ
ತನ್ನ ಒಗಟಿಗೆ ತಾನೇ
ಉತ್ತರ ಕೊಡುವಂತೆ.
ದಿನವಿಡೀ ದಿವ್ಯ ಮೌನಧರಿಸಿ
ಅದೃಶ್ಯವಾಗಿಬಿಡುವ ಈ ಹಕ್ಕಿಯ
ಹಾಡು ಮತ್ತೆ ಬೇಕೆಂದರೆ
ಕಾಯಬೇಕು ಇನ್ನೊಂದು ನಸುಕಿಗೆ.
ನೆನಪು
ಹಲವು ವರ್ಷದ ಬಳಿಕ
ನೆಚ್ಚಿನ ಪ್ರೊಫೆಸರರನ್ನು ಕಾಣಲೆಂದು
ಮನೆ ಹುಡುಕಿ ಹೊರಟೆ
ಕೈಯಲ್ಲಿ ಹಣ್ಣು ಹಿಡಿದು.
ತೊಂಬತ್ತರ ಅಂಚಿನಲ್ಲಿ
ಗಾಲಿಖುರ್ಚಿಯ ಮೇಲೆ
ಕಳಿತ ಹಣ್ಣಿನಂತೆ ಕುಳಿತಿದ್ದರು.
ನೆನಪು ಕೆದಕಲೆಂಬಂತೆ ನುಡಿದೆ:
“ನಾನು ನಿಮ್ಮ ವಿದ್ಯಾರ್ಥಿ, ಸರ್”
ಅವರು ಕಣ್ಣರಳಿಸಿ ತುಂಟನಗೆಯೊಂದಿಗೆ
ಅಕ್ಕರೆಯಿಂದ ಕೇಳಿದರು:
“ವಾಟ್ ಈಸ್ ಯುವರ್ ರೋಲ್ ನಂಬರ್?”
ಬಳಿಕ ನಾವಿಬ್ಬರೂ ಮಾತಿಲ್ಲದೆ
ಕಿಡಕಿಯಾಚೆಯ ಗಿಡಮರಗಳ
ಸಂಜೆ ಬಿಸಿಲಿನ ಜೊತೆಯ
ಕಣ್ಣಾಮುಚ್ಚಾಲೆ ನೋಡುತ್ತ
ಕುಳಿತಿರಬೇಕು.
ಇಷ್ಟವಾಯಿತು