ಜಯಶ್ರೀ ಬಿ ಕದ್ರಿ
**

ಯಾರಿಂದಲೂ ಏನನ್ನೂ
ಕಡ ಕೇಳಬಾರದು

ಪ್ರೀತಿಯ ಕಡವನ್ನು
ಆದರದ ಕಡವನ್ನು
ಕಡೆಗೊಂದು
ಮುಗುಳು ನಗೆಯನ್ನು
ಕೂಡ

ಯಾರಿಗೂ ಕಡವನ್ನು
ಕೊಡಲೂ ಬಾರದು
ಪ್ರೀತಿಯ ಕೊಡ ತುಂಬಿ
ಪನ್ನೀರೆಂದು
ಬೂದಿಗೆ ಸುರಿದರೆ
ವ್ಯರ್ಥ

ಒಲುಮೆಯಿಂದ ಅಕ್ಕರೆಯ
ಪೂರ ಹರಿಸಿದರೆ
ವ್ಯರ್ಥ
ಈ ಭೂಮಿ ಈ ಕಾನು
ಈ ನೀರು ಈ ಗಾಳಿ
ಎಲ್ಲವೂ
ದೇವರಿತ್ತ ಕಡ
ಆಗಿರುವಾಗ

ಯಾರಿಗೆ ಯಾರೂ
ಕಡ ತೆರುವುದೂ ಬೇಡ
ಪಡೆಯುವುದೂ ಬೇಡ

ಎಂದೆಲ್ಲ ಹೇಳಿದರೂ
ಮನಸು ಮಗುವಾಗಿ
ಲಾಲಿಪಾಪ್ ನಂತೆ
ಕಡ ಕೇಳುತ್ತದೆ
ಕೆಲವು ಕಡವನ್ನು
ತೀರಿಸಲೇ ಆಗದು
ತಲೆ ಸವರಿ ತಲೆದೂಗಿದ
ಟೀಚರಿನ ಕಡವನ್ನು
ನೆರಿಗೆ ತುಂಬಿದ ಮೊಗದಿ
ಬೆಳಕು ಹರಿಸಿದ ಕಡವ

ಕೇಳದೆಯೆ ಕೊಟ್ಟವರು
ನಸು ನಗುತ ನಿಂದವರು
ಬಾಳ ಹಾದಿಯಲಿ
ಕೈ ಬೀಸಿದವರು

ಹಾಗಾಗಿಯೇ ನಾನೀಗ 
ಯಾವ ಲೆಕ್ಕವನು ಇಡುತ್ತಿಲ್ಲ

ಕೊಟ್ಟಿದ್ದು ಕಡ
ಪಡೆದುಕೊಂಡದ್ದೂ
ಕಡವೇ