ಡಾ ಪ್ರೇಮಲತ ಬಿ
ಹಾಗಿದ್ದರೇ ಚೆನ್ನ ಕನಸಿನಂತೆ
ಕಾತರಿಸಿ ಕನವರಿಸಿ ಕೈ ಹಿಡಿದು ನೇವರಿಸಿ
ಮುಷ್ಠಿಯಲಿ ಸುತ್ತಿ ಬಳಸಿಡಿದರೂ ಬರಿದಾಗುಳಿವ
ಬೆರಳುಗಳಂತೆ, ಮತ್ತೆ ಬೇಡುವಂತೆ
ತುಟಿಯಗಲಿಸಿ ಬೇಡಿ, ನಾಲಗೆ ಚಪ್ಪರಿಸಿ
ತಂಪು ತಂಪೆನಿಸಿ ಕುಡಿದಷ್ಟೂ
ದಾಹ ತಣಿಸದ, ಬತ್ತದ
ನಿರಂತರ ಸಿಹಿನೀರ ಒರತೆಯಂತೆ
ಅಕ್ಷಯವಾಗುವ ಅಸ್ಪಷ್ಟ ಆಕಾರ
ಬಿರುಬಿಸಿಲು ಸುಟ್ಟಾಗ ತಲೆ-ಪಾದ
ಬೀಸಿ ಬರುವ ತಂಗಾಳಿ
ಹೊತ್ತು ತರುವ ದಿವ್ಯ ಗಂಧದಂತೆ
ಕಳೆದು ಹೋದೆಯೆಂದೇ ಬಗೆದು
ನಿಟ್ಟುಸಿರನಿಟ್ಟ ಒಂಟಿದಿನಗಳಲಿ
ಮನ ಬಗೆದು ನೋಡಲು ಫಕ್ಕನೆ
ಎದುರಾಗಿ ಸಂತೈಸುವ ದಾರ್ಶನಿಕನಂತೆ
ನಿಮಿಷಗಳಲಿ ಮುಗಿಯದ ಸುಖ
ಕೂಡಲಾಗದ ಈ ಬದುಕಿನಲಿ
ಸದ್ದುಮಾಡದೆ ಸುಮ್ಮನೆ ಲೀನವಾಗಿದ್ದುಬಿಡು
ಹಾಗಿದ್ದರೆ ಚೆನ್ನ, ಮುಗಿಯದ ಸಿಹಿ ಕನಸಿನಂತೆ
0 ಪ್ರತಿಕ್ರಿಯೆಗಳು