ಶ್ರೀದೇವಿ ಕೆರೆಮನೆ

---

ಜೀವನ್ ಪ್ರಕಾಶನದ ರಾಜ್ಯಮಟ್ಟದ

ಯುಗಾದಿ ಕಾವ್ಯ ಸ್ಪರ್ಧೆ-2016ರ ಮೆಚ್ಚುಗೆ ಪಡೆದ ಕವಿತೆ

---

 

 

ಕಣ್ಣೀರು ಮಾರಲಿಟ್ಟಿದ್ದೇನೆ

ಅತಿ ಕಡಿಮೆ ಬೆಲೆಗೆ

ತರೇಹವಾರಿ ಕಣ್ಣೀರು ನೋವಿಗೂ ದುಃಖಕ್ಕೂ

ಕೊನೆಗೂ ಸಂತೋಷಕ್ಕೂ
ವಿರಹದ ಉರಿಗೆ ಕಳೆದು-

ಹೋದ ಪ್ರೀತಿಗೆ

ಎಲ್ಲದಕ್ಕೂ ಪ್ರತ್ಯೇಕ ದರ ಗಲ್ಲಾಪೆಟ್ಟಿಗೆಯ

ತುಂಬಾ ಕಾಂಜಾಣದ

ಝಣಝಣ, ಆದರೂ

ನೆಮ್ಮದಿಯಿಲ್ಲ

ಬೇಕಿತ್ತು ಇನ್ನಷ್ಟು ಹಣ ಕೊಂಡುಕೊಳ್ಳಲು

ಮತ್ತಷ್ಟು ಗಿರಾಕಿಗಳು

ಈಗ ಕೆಲವು ಬಗೆಯ

ಕಣ್ಣೀರಿಗೆ ರಿಯಾಯತಿ

ದರ ಘೋಷಿಸಿದ್ದೇನೆ, ವಿರಹದ ಕಣ್ಣೀರಿಗೆ

ಸ್ವಲ್ಪವೇ ದುಡ್ಡು

ಕಳೆದುಕೊಂಡ ಪ್ರೀತಿಗಂತÀೂ

ಮತ್ತೂ ಕಡಿಮೆ

ಮೊನ್ನೆ ಅಂಗಡಿಯ ಬಾಗಿಲಿಗೆ ಒರಗಿ

ನಿಂತವಳ ಕಣ್ಣಲ್ಲಿ

ಏನೋ ಒಂದು ನೋವು

ಪ್ರೀತಿಸಿದಾತನ

ಮೋಸಕ್ಕೆ ಬಲಿಯಾದವಳ ಎದೆಯಲ್ಲಿ

ಅಳುವಷ್ಟೂ ಇರಲಿಲ್ಲ

ಕಣ್ಣೀರು, ಹಣ ಕೊಟ್ಟು

ಕಣ್ಣಿರು ಖರೀದಿಸುವಷ್ಟೂ

ಶಕ್ತಿಯೂ ಆಕೆಗಿರಲಿಲ್ಲ, ಉಪಕಾರ ಮಾಡುವ

ಹಮ್ಮಿನಲಿ, ಒಂದಿಷ್ಟು

ಕಣ್ಣೀರು ದಾನ ಮಾಡಿದೆ.

ಇಂದಾಕೆ ಆ

ಕಣ್ಣೀರಿನ ಹಣವನ್ನು ಕೊಟ್ಟುಹೋಗಲು

ಬಂದಿದ್ದಾಳೆ, ಪಕ್ಕದಲ್ಲೊಬ್ಬ

ಸಿರಿವಂತ ಹುಡುಗ

ಆಸೆಗಣ್ಣಲಿ

ನಿಂತಿದ್ದಾನೆ,  ಅವಳ ಕಣ್ಣೀರ ಮಾರಿ

ದುಪ್ಪಟ್ಟು ಗಳಿಸಲು.

ನಿನ್ನೆ ಬಂದ ಹುಡುಗನಿಗೆ

ಮೋಸದ ಕಣ್ಣೀರು

ಬೇಕಿತ್ತು, ಒಂದಾಗಲು ಒಪ್ಪದ ಹುಡುಗಿಗೆ

ಕಣ್ಣೀರು ಸುರಿಸಿ

ಆಕೆಯ ದೇಹ ಪಡೆಯಬೇಕಿತ್ತು

ವ್ಯಾಪಾರಕ್ಕೆ ನಿಂತ

ನನಗೆ, ಕೊಳ್ಳುವವರ ಕಾರಣ ಬೇಕಿರಲಿಲ್ಲ

ನಾಲ್ಕರಷ್ಟು ಅಧಿಕಮೊತ್ತ

ಪಡೆದು ಜೇಬು ತುಂಬಿಸಿ-

ಕೊಳ್ಳುವುದಷ್ಟೇ

ವ್ಯಾಪಾರದ ಸತ್ಯ; ಉಳಿದಿದ್ದೆಲ್ಲ ಮಿತ್ಯ.

ಆ ಮೂಲೆಯಲ್ಲಿ ಸೊಂಟಕ್ಕೊಂದು

ಮಗು ಸಿಕ್ಕಿಸಿ,

ಎದೆ ಬತ್ತಿದ, ಬೆನ್ನಿಗಂಟಿದ ಹೊಟ್ಟೆಯ

ಹೆಣ್ಣಿನಾಕೃತಿಯೆಡೆಗೆ

ಗಮನಹರಿಸುವಷ್ಟು ಪುರುಸೊತ್ತು

ಇರಲಿಲ್ಲ. ಎಲ್ಲೋ

ಅಪಘಾತದಲ್ಲಿ ಸತ್ತವರ ಸಂಬಂಧಿಕರಿಗೆ ಕಣ್ಣಿರು

ಪೂರೈಸಿ ನಾನು

ಹೈರಾಣಾಗಿದ್ದೆ, ಆಕೆ ಕೊಡಲಾಗದ

ಹಣಕ್ಕೆ, ಸಮಯ

ಕಳೆದುಕೊಳ್ಳುವಷ್ಟು ಉದಾರತೆ ಇರಲಿಲ್ಲ

ಎರಡು ದಿನದಿಂದ

ನಿಂತ ಜಾಗದಿಂದ

ಕದಲದಾಕೆಯನ್ನು

ಸನ್ನೆ ಮಾಡಿ ಹತ್ತಿರ ಕರೆದೆ, ಹೌದು,

ಆಕೆಗೂ ಕಣ್ಣೀರು ಬೇಕಿತ್ತು

ಸತ್ತ ಗಂಡನ ನೆನೆದು

ಅಳಬೇಕಿತ್ತು

ಕೊಡಲು ಮಾತ್ರ ಕಾಸಿರಲಿಲ್ಲ. ಬತ್ತಿಹೋದ

ಕಣ್ಣೀರಿಗೆ ಅರ್ಥ ಕಲ್ಪಿಸಿ,

ಮನೆಯಿಂದ ಹೊರನೂಕಿದ

ಅತ್ತೆ ಮಾವ

ನೆರೆ ಹೊರೆಯವರಿಗಾಗಿ ಆಕೆ ಅಳಬೇಕಿತ್ತು

ಮಗುವಿನ ಹೊಟ್ಟೆಗೊಂದು

ತುತ್ತಿಗಾಗಿ, ತಲೆ ಮೇಲೆ

ಒಂದು ಸೂರಿಗಾಗಿ

ಕಾಮದ ಕಣ್ಣಿಂದ ತಪ್ಪಿಸಿಕೊಳ್ಳುವುದಕ್ಕಾಗಿ

ಆಕೆಗೆ ಕಣ್ಣೀರಿನ

ಅನಿವಾರ್ಯತೆಯಿತ್ತು

ತುರ್ತು ಕಾಲಕ್ಕಿರಲೆಂದು

ಸಂಗ್ರಹಿಸಿಟ್ಟ, ಎಲ್ಲಾ ಕಣ್ಣೀರನ್ನು ಅವಳೆದುರಿಗಿಟ್ಟು

ಒಂದೂ ಮಾತನಾಡದೆ,

 

ನಾನು ಕಣ್ಣೀರಿನ ಅಂಗಡಿಗೆ

ಬೀಗ ಹಾಕಿದೆ….