ಶೋಭಾ ದಿನೇಶ್ 

 

ನನ್ನೊಳಗಿನ ಅವನಿಗೆ

 
ನನಗಿನ್ನೂ ನೆನಪಿದೆ…ಮೊಟ್ಟ ಮೊದಲು ನಿನ್ನ ನೋಡಿದ ಆ ದಿನ…

ಹಿಡಿತಕ್ಕೆ ಸಿಗದ ಜೋರು ಮಳೆ…

ಬೋಳು ಗುಡ್ಡದ ನೆತ್ತಿಯ ಮೇಲೆ..

 

ಎದುರಿಗೆ ಕುಳಿತವನ ಕಣ್ಣುಗಳಲ್ಲಿ ನನ್ನ ಚಿತ್ರ ಹುಡುಕಿ..

ಪುಳಕ ಕೊಂಡ ಅಸ್ಪಷ್ಟ ರಾಗ ನಾನು..

ಪ್ರೀತಿ ಪಲ್ಲವಿಯಲ್ಲೇ ಗಿರಕಿ ಹೊಡೆಯಲು ಬಿಡದ ಪೋರ..

ಒಬ್ಬರಿಗೊಬ್ಬರು ಇಷ್ಟವಾದ ಮೇಲೆ ಬದುಕು ಯುಗಳ ಗೀತೆ…

ನಿನ್ನ ತುಂಟತನ, ನವಿರು, ಹೊಳಪಿಗೆ ಸೋತೆನ ನಾನು?

 

ಚೆಲುವ ಅನ್ನಿಸಿದ್ದು ನಿಜ.. ಮೊದಲ ನೋಟಕ್ಕೆ..

ಆದರೆ ಹಟಕ್ಕೆ ಬಿದ್ದಂತೆ ಪ್ರೀತಿಸುತ್ತೇನೆಂದು ಕೊಂಡಿರಲಿಲ್ಲ ಆ ಕ್ಷಣಕ್ಕೆ..

ಏನಾಗಿ ಹೋಯ್ತು??? ನನ್ನೊಳಗಿನ ನಾನು ನಿನ್ನ ತೆಕ್ಕೆಗೆ..

 

ಹಸಿವು ತುಂಬಿದ ನಿನ್ನ ಕಣ್ಣ ಮುಂದೆ..

ಹುಲ್ಲೆಯಂತ ಹುಡುಗಿ ನಾನು….

ಪುಂಡ ಚಿರತೆಯಂತ ಹುಡುಗ ನೀನು..

 

ಬೆಂಕಿ ಬೆರೆತ ನಿನ್ನ ಉಸಿರಾಟಕ್ಕೆ.. ಕಿವಿ ಕೊರಳಲೆಲ್ಲ ಕೆಂಪು.. ಕೆಂಪು..

ತಂತಿ ಮೊಳೆತ ವೀಣೆ ಕಿಬ್ಬೊಟ್ಟೆಯಲ್ಲಿ

ಕೈ ಕಾಲು ಕೆಟ್ಟು ಕೆಡವಿದರು ಕಣ್ಣಲ್ಲೇ ದುಪ್ಪಟ್ಟ ಎಳೆಯುವ ಹಿಮ ಕರಡಿ..

ಎಲ್ಲಿ ಕಲಿತೆ ಕೋತಿ ಮರಿಯಾ ಈ ವಿದ್ಯೆ???

 

ಒರಟು ಮಂಡಿಯ  ಮೇಲಿನ ಜೀನ್ಸಿಗೆ ..

ಕಪ್ಪ ಕಟ್ಟಿ ಶರಣಾಗಿದೆ ಮೊಲದ ಬಿಳುಪಿನ ಚೂಡಿ..

ಶುದ್ದ ಒರಟ…

ಮೊಬೈಕಿನಲ್ಲಿ ನಿನ್ನ ಬೆನ್ನಿಗಂಟಿ ಊರು ಸುತ್ತುವ ಉಮ್ಮೇದಿ..

ಸವೆದಷ್ಟು ಮುಗಿಯದ  ಹಾದಿ.. ಬದುಕು ಶಿವ ನರ್ತನ.. ಮನಸು ನಿತ್ಯ ಕೀರ್ತನ..

ಮತ್ತೆ ಬಂದ್ದಿದ್ದಾನವ…

 

ಬರದ ಊರಿನಲ್ಲೂ ಜೀವ ಜಲ ಉಕ್ಕಿಸೋ ತಾಕತ್ತಿನವ…

ನೋಡಿದಾಕ್ಷಣದಿಂದ ಎದೆಯೊಳಗೆ ನೂರು ದೇವರ ಉತ್ಸವ…

 

ಮತ್ತೆ ಬಂದ್ದಿದ್ದಾನವ…

ಕಾರ್ಗತ್ತಲ ಕೋಟೆಯಲ್ಲಿ ಬೆಳಕ ಹುಟ್ಟಿಸಿದವ…

ಮೊನಚು ನೋಟಕ್ಕೆ ನರ ನಾಡಿಗಳೆಲ್ಲಾ ತಬ್ಬಿದಂತೆ ಹೆಬ್ಬಾವ…

 

ಮತ್ತೆ ಬಂದ್ದಿದ್ದಾನವ…

ನೆರಿಗೆ ಲಂಗವ ನೋಡಿ ಮೀಸೆಯಡಿ ನಕ್ಕವ

ನಗೆಯ ಅಲೆಗೆ ಬೆನ್ನಹುರಿಯಿಂದ ಕಾಲ್ಬೆರಳ ತನಕ ಕಲರವ..

 

ಮತ್ತೆ ಬಂದಿದ್ದಾನವ..

ತಡೆತಡೆದು ನಡೆದವ ನಡೆ ನಡೆದು ನುಡಿದವ

ದಿನವೂ ನೆನಪುಗಳ ನಿತ್ಯೋತ್ಸವ..