ಉಗಾದಿಗೆ…

– ನಾಗತಿಹಳ್ಳಿ ರಮೇಶ

ಬರಲಿ ಬರಲಿ ಉಗಾದಿ
ಹೊಸ ಹರುಷವ ತರಲಿ ಯುಗಾದಿ
ಬರಲಿ ಬರಲಿ ಉಗಾದಿ
ನಿಜ ಸುಖವ ತರಲಿ ಯುಗಾದಿ
ದುಡಿವ ತೋಳಿಗೆ ಚೇತನವಾಗಿ
ದುಃಖದ ಬಾಳಿಗೆ ಸಂತಸವಾಗಿ
ನೆತ್ತರು ಹರಿಸುವ ಮನವು ಬತ್ತಿ
ಬೆಳಗಲಿ ಒಲವಿನ ಹಣತೆಯು ಹೊತ್ತಿ
ಹೊಂಗೆ ಬೇವಿನ ಹೂಗಳ ಕಂಪಲಿ
ಹರಿವ ನೀರಿನ ಅಲೆಗಳ ತಂಪಲಿ
ಗಿಡಮರ ಬಳ್ಳಿಯ ಚಿಗುರಿನ ಹೊಳಪಲಿ
ಕಬ್ಬಿನ ಜಲ್ಲೆಯ ಸುಗ್ಗಿಯ ಹಸಿರಲಿ
ಬರಲಿ ಬರಲಿ ಉಗಾದಿ

ಮಾವಿನ ಮರದಲಿ ಕೋಗಿಲೆ ಸ್ವರದಲಿ
ಜೀವನ ಜೋಕಾಲಿ ಜೀಕುತಾ ಬರಲಿ
ಅರಳೀ ಮರದಲಿ ಆಲದ ಮರದಲಿ
ಕಾಗೆಯ ಕರುಳಿನ ಕರೆಯು ಮೊಳಗಲಿ
ಜನಮನ ಜೀವನ ಚಾಲಕ ಶಕ್ತಿ
ಪ್ರೇಮ ಕಾಂತಿಯ ಕಂಗಳ ದೀಪ್ತಿ
ಅವ್ವನ ಕೈಯಲಿ ಮೂಡುವ ಹೋಳಿಗೆ
ತುಂಬಲಿ ಊರು ಕೇರಿಯ ಜೋಳಿಗೆ
ಬಾ ಉಗಾದಿ ನವ ಯುಗಾದಿ
ನೇಗಿಲ ಬೆವರಿಗೆ ನೆಲವು ಅರಳಿ
ಒಲುಮೆಯ ಬಾಳಿಗೆ ತೋರಣಕಟ್ಟಿ
ನಮ್ಮೆದೆ ಕಾಡಲಿ ಸೊಬಗಿನ ನವಿಲು
ಗರಿಗಳ ಬಿಚ್ಚಿ ಕುಣಿಯುತಾ ಬರಲಿ
ಕತ್ತಲೆ ಬದುಕಿಗೆ ಸಮತೆಯ ಕರುಣೆಯ
ಬೆಳಕಿನ ನದಿಯು ಹರಿಯುತಾ ಬರಲಿ
ಎಲ್ಲರೆಲ್ಲರ ಕಣ್ಣೊಳು ಮಗುವಿನ ನಗುವು
ನಲಿಯುವ ಕಾಲವು ತುಂಬಿ ಬರಲಿ