ಸಂದೀಪ್ ಈಶಾನ್ಯ ಅವರ ಕವಿತೆ ‘ಎರಡು ದೇಹಗಳ ನಿರಂತರ ಹೊರಳಾಟದಿಂದ‘ ಅವಧಿಯಲ್ಲಿ ಪ್ರಕಟವಾಗಿತ್ತು .

ಆ ಕವಿತೆ ಇನ್ನೊಬ್ಬಕವಿಯಲ್ಲೂ ಕಿಚ್ಚು ಹಚ್ಚಿತು. ‘ಮಹೀ’ ಅನ್ನುವ ಹೆಸರಿನಲ್ಲಿ ಬರೆಯುವ ಪಶುವೈದ್ಯ ಡಾ ಮಹೇಂದ್ರ ‘ನುಣುಪಾದ ಕಾಲಿನ ಮೇಲೆ ಜಾರೋ ಬಂಡಿಯಾಟ..’ ಬರೆದರು.

ಇದನ್ನು ಓದಿದ ಗೀತಾ ಹೆಗ್ಡೆ ಕಲ್ಮನೆಯವರು ಅದಕ್ಕೆ ಹೌದು ನನಗೂ ಕೋಪ ಬರುತ್ತಿದೆ.. ಎಂದು ಪ್ರತಿಕ್ರಿಯಿಸಿದರು.  

ಮೈಸೂರಿನಿಂದ ನಾಗೇಶ ಮೈಸೂರು ಬರೆದರು – ಪಿಸುಗುಟ್ಟಿದ ಕತ್ತಲ ಮಾತು..

ಈ ಎಲ್ಲಾ ಕವನಗಳಿಗೆ ಕಿಚ್ಚು ಹಚ್ಚುವಂತೆ ಉತ್ತರ ಬಂದಿದ್ದು ಶಮ ನಂದಿಬೆಟ್ಟ ಅವರಿಂದ  

ನಿನ್ನ ಬೆನ್ನ ತಿರುವಿನ ಕಂದು ಮಚ್ಚೆಗೆ.. ಕವಿತೆ ಬರೆದರು

ಕಿರಣ್ ಕಂಗೊಕರ್ ಕಿತ್ತೆಸೆದ ಬಟ್ಟೆಗಳು ಮೈಯಡಿಯಲ್ಲಿ ಸಿಲುಕಿ.. ಬರೆದರು 

ವಿನಿ ನಾಯಕ್ ಬೆಳಕಲ್ಲಿ ಕೆನ್ನೆಯ ರಂಗಾಗಿ.. ಬರೆದರು.

ಆನಂದ ಋಗ್ವೇದಿ ಎಲ್ಲಾ ಬಿಚ್ಚಿ.. ಹೇಳಲಾಗುವುದಿಲ್ಲ!! ಎಂದು ಅದಕ್ಕೆ ತಮ್ಮ ದನಿ ಸೇರಿಸಿದರು  

ಕುಸುಮಾ ಪಟೇಲ್ ಮಚ್ಚೆ ಎಂದೊಡನೆ ನೆನಪಾಗುತ್ತಾನೆ.. ಎಂದು ನೆನಪಿಸಿಕೊಂಡರು 

ಈಗ ಸ್ಫೂರ್ತಿ ಗಿರೇಶ್ ಕವಿತಾ ಸರಣಿಗೆ ಜೊತೆಯಾಗಿದ್ದಾರೆ 

ಓದಿ 

ಅಷ್ಟೇ ಅಲ್ಲ, ಈ ಕವಿತೆಗಳು ನಿಮ್ಮೊಳಗೆ ಕಿಚ್ಚು ಹಚ್ಚಿದ್ದಲ್ಲಿ

ನೀವೂ ಕವಿತೆ ಮುಂದುವರೆಸಿ  

ಮಳೆ ಕೊಚ್ಚಿದ ಹೊಳೆ…

ಸ್ಪೂರ್ತಿ ಗಿರೀಶ್

ಸಂಜೆಗೂ ಮುನ್ನ ದಟ್ಟವಾಗಿ
ಮಬ್ಬು
ಕವಿದ ಆಕಾಶ
ನಿಲ್ಲದ ಸೆಳೆತಕ್ಕೆ ನಿಲ್ದಾಣದಂತವನು
ಎದೆಗಾನಿಸಿಕೊಂಡು ವಿರಮಿಸೆಂದ

ಮರವ ತಬ್ಬಿದ ನೆರಳು
ನೆರಳನಾಡಿಸುವ ಬೆರಳು
ಕಣ್ಕಲೆತು ಮೂಗರಳಿ
ಹಸಿಮಣ್ಣಿನ ವಾಸನೆ
ನೆಲದ ತುಂಬಾ

ಬಿಡದೆ ಸುರಿವ ಮಳೆಗೆ
ಹೊಳೆ
ಮೈದುಂಬಿ
ಮನದುಂಬಿ ಕೊಚ್ಚಿ
ಹುಚ್ಚು ಹರಿದಾಡಿ ಹೆಚ್ಚುಗಾರಿಕೆಯೇನು
ಕೂಡಿಪಡೆದ ಮೋಹ
ತೀರಲೊಲ್ಲದ ದಾಹ

ನಿಲ್ಲದ ಸೆಳೆತಕ್ಕೆ ನಿಲ್ದಾಣದಂತವನು
ಎದೆಗಾನಿಸಿಕೊಂಡು  ರಮಿಸು ಎಂದ