ರೇಣುಕಾ ನಿಡಗುಂದಿ

ಅವಳ ನಿನ್ನೆಗಳಲ್ಲಿ ಒಬ್ಬನೇ ಪುರುಷನಿರಲಿಲ್ಲ.. ಅನೇಕರಿದ್ದರು.

ಬಂದ ಹಾಗೇ ಎದ್ದೂ ನಡೆದರು. ಮತ್ತೆ ಆಕೆ ಒಬ್ಬಂಟಿ.

ಹಲವಾರು ಪುರುಷರು .. ಹಲವಾರು ಸಂಬಂಧಗಳು ಇದ್ದವೆಂದೇ ಆಕೆಯನ್ನು ಯಾರೂ ಒಪ್ಪಿಕೊಳ್ಳಲಿಲ್ಲ.

ಎಲ್ಲ ರೀತಿಯ ಅವಮಾನಗಳನ್ನೂ.. ನಿರಾಕರಣೆಯನ್ನೂ ಸಹಿಸಬೇಕಾಯ್ತು. ಎಲ್ಲ ಹೆಣ್ಣಿನಂತೆ ಆಕೆಗೂ ಪ್ರೀತಿಸುವ ಗಂಡ.. ಮುದ್ದಿಸಲು ಮಕ್ಕಳು ಎಲ್ಲವೂ ಬೇಕಿತ್ತು.. ಆದರೆ ಆಕೆ ಬಯಸಿದ ಯಾವದೂ ಸಿಗಲಿಲ್ಲ ಆಕೆಗೆ.. ಈಗಿನ ಕಾಲದಲ್ಲಿ molestation… Abuse ಏನೆಲ್ಲ ಹೆಸರಿನ ಶೋಷಣೆ, ದೌರ್ಜನ್ಯ.. ಅತ್ಯಾಚಾರಗಳಿವೆಯೋ ಅವೆಲ್ಲವನ್ನೂ ಆಕೆ ಅನುಭವಿಸಿದಳು.

ವಿನೋದ್ ಮೆಹ್ರಾನನ್ನು ಮದುವೆಯಾಗಿ ಅವನ ಬಂಗಲೆಗೆ ಮದುವೆ ಹೆಣ್ಣಾಗಿ ಹೋದರೆ ಅವನ ತಾಯಿ ಅವಳನ್ನು ಸ್ವೀಕರಿಸದೇ ಬಾಗಿಲಲ್ಲೆ ಚಪ್ಪಲಿ ತೆಗೆದು ಹೊಡೆದಳಂತೆ. ಕಣ್ಣೀರು ಹಾಕಿಕೊಂಡು ಹೋದ ರೇಖಾ ಮತ್ತೆ ಅಲ್ಲಿ ಕಾಲಿಡಲಿಲ್ಲ.

ಭಾಷೆಯೇ ಬಾರದ ಆಕೆ ಮುಂಬೈ ಸಿನೇಮ ಜಗತ್ತಿನ ಸುಂದರಿಯಾಗಿ ಮೆರೆದಳು.. ಅಮಿತಾಭ ಜತೆಗಿನ ಪ್ರೇಮ ಸಂಬಂಧವೂ ಅವಮಾನ.. ಅವಹೇಳನದಲ್ಲಿ ಮುಗಿದು ಹೋಯಿತು.

ದಿಲ್ಲಿಯ ಉದ್ಯಮಿ ಮುಖೇಶ ಅಗರ್ ವಾಲ್ ನನ್ನು ಕೆಲ ಹಿತಚಿಂತಕರ ಸಲಹೆ ಮೇರೆಗೆ ಮದುವೆಯಾದಳು. ಅವನೋ ಮೊದಲೆ ಡಿಪ್ರೆಶನ್ ರೋಗಿ. ಅವಳ ದುಪ್ಪಟ್ಟಾದಿಂದಲೇ ಆತ್ಮಹತ್ಯೆ ಮಾಡಿಕೊಂಡ. ಅದನ್ನೂ ಅವಳ ತಲೆಗೆ ಕಟ್ಟಿದರು. ಆಕೆ ನರಭಕ್ಷಕಿ.. ಡಾಯನ್.. ಇನ್ನೂ ಏನೆನೋ..

ಅವಳನ್ನು ಬಲ್ಲ ಅಂದಿನ ಕಾಲದ.. ಇಂದು ಮುದಿಯರಾಗಿ ಹೋದವರು ಈಗಲೂ ಅಶ್ಲೀಲ ಪದಗಳನ್ನು ಬಳಸಿ ಬಾಯ ತೀಟೆಯನ್ನು ತೀರಿಸಿಕೊಳ್ಳುತ್ತಾರಂತೆ.

ಅವಳ ಖಾಸಗಿ ಬದುಕು ಹೇಗೇ ಇದ್ದಿರಲಿ ಅವಳೂ ಒಬ್ಬ ಹೆಣ್ಣುಮಗಳು.. ಅವಳಿಗೂ ಪ್ರೀತಿಸುವ ಸಂಗಾತಿ.. ಅವಳಂತೇ ಮುದ್ದಾಗಿರುವ ಮಕ್ಕಳು ಎಲ್ಲವೂ ಸಿಗಬೇಕಿತ್ತು. ಸುತ್ತಲಿನ ಸಮಾಜ ಜನರು… ಆಕೆ ಸೆಲೆಬ್ರಿಟಿ ಇರಲಿ… ಇಲ್ಲದಿರಲಿ… ಹೆಣ್ಣನ್ನು ತೂಗುವ ಕತ್ತಿಯ ಮೇಲೆ ನಡೆಸಿ ಅವಳ ಪಾವಿತ್ರ್ಯತೆಯ ಆಧಾರದ ಮೇಲೆ ಅವಳ ಮೌಲ್ಯಮಾಪನ ನಡೆಸುತ್ತಾರೆ.

ಪುಸ್ತಕ ಕೈ ಸೇರುವವರೆಗೂ ಇದೇ ಮಂಥನ… ಏನೇನೋ ಆಖ್ಯಾನ ವ್ಯಾಖ್ಯಾನಗಳ ಸುಳಿಯಲ್ಲಿ.