unique supri

ಒಂಟಿ ಹಕ್ಕಿ ಹಾಡು

ಚಿತ್ರ : ತಮಲ್

ಈತ ಅಭಿಮನ್ಯು
ಹೊರಬರುವ ದಾರಿ
ತಿಳಿಯದಿದ್ದರೂ
ವ್ಯೂಹದೊಳಗೆ
ನಿತ್ಯ ನಿತ್ಯವೂ
ನುಗ್ಗುವ

ವ್ಯೂಹವೂ ತರಹೇವಾರು
ಪಾದಯಾತ್ರೆಯಲಿ
ಶುರುವಾಗಿ
ಜೇಮ್ಸ್ ಕೆಮರಾನ್
ಭಾಷಣದವರೆಗೆ
ಕ್ಯಾನ್ಸರ್ ಉಂಟು ಮಾಡಿ
ನಿವಾರಿಸುವ ಶುಂಠಿ
ಕಡಲ್ಗಾಲುವೆಯ ಈಜಿ
ದಡಸೇರುವ ಕುಂಟಿ

ಶತ್ರುಗಳು ಒಬ್ಬಿಬ್ಬರಲ್ಲ
ಐನು ಟೈಮಿಗೆ
ಕೈಕೊಡುವ ಉಪ್ಪಿಟ್ಟು
ಇಸ್ತ್ರಿಗೆ ಲೋಹ
ಕಾಯುವಾಗ
ಕತ್ತರಿಸಿ ಬೀಳುವ ಕರೆಂಟು
ತುರ್ತು ಕರೆ ಬಂದಾಗಲೇ
ಮಾಯವಾಗುವ ಒಂಟಿ ಸಾಕ್ಸು

ಗೇಟಿನೆದುರು ಡಬಲ್
ಪಾರ್ಕಿಂಗು
ತಂಪು ಬಸ್ಸಲ್ಲಿ ಬಿಸಿಯೇರಿಸುವ
ಮಾನಿನಿಯರು
ಜಗವನ್ನೇ ಗೆಲ್ಲ ಹೊರಡುವ
ವೀರನಿಗೆ
ಕಾಲವೇ ದೊಡ್ಡ ಶತ್ರು

ಇಷ್ಟಕ್ಕೆಲ್ಲ ದಣಿಯುವವನಲ್ಲ
ನಮ್ಮ ಅಭಿಮನ್ಯು
ಸಂಜೆ ಎಂಟಾದರೂ
ಡಿಯೋಡರೆಂಟಿಗೆ ಕೆಲಸವಿಲ್ಲ
ಟಾಯ್ಲೆಟಿಗೆ ನಾಲ್ಕಾರು
ಸಲ ಕಾಲಿಟ್ಟರೂ
ಉತ್ಸಾಹಕ್ಕೆ ಕೊರತೆಯಿಲ್ಲ

ಕರ್ಣ, ದುಶ್ಯಾಸನಾದಿಗಳು
ನೂರು ದಿಕ್ಕಿನಿಂದ
ನುಗ್ಗಿದರೂ ನಿಗ್ರಹಿಸಬಲ್ಲ
ಧೀರ
ಹೋರಾಟದಿ ದೂರ
ಹೋದ ತಂದೆಯ
ನೆನಪಲ್ಲಿ ಎದೆಯು
ಭಾರ

ಕಡೆಗೂ ಹತನಾಗುವನು
ಅಭಿಮನ್ಯು
ಕಂಡ ಕಂಡಲ್ಲಿ ವ್ಯೂಹವ ಭೇದಿಸಿ
ಮರುದಿನದ
ಮರುಜನ್ಮಕೆ ಅಣಿಯಾಗಿ
ದಿನದ ಶವವನ್ನು
ಹಾಸಿಗೆಯಲಿ ಹೂಳುತ್ತ…