-ಪ್ರತಿಭಾ ನಂದಕುಮಾರ್

ಬರೆಯುವವರಿಗೆ ಒಂದು ಕಟ್ಟುಪಾಡಿದೆ
ಅವರೇ ಹಾಕಿಕೊಂಡದ್ದು
ಕೂದಲ ರಾಶಿ ಅವಳ ಮೈತುಂಬ ಆವರಿಸಿ
ಪೂರಾ ಮುಚ್ಚಿ ಮುಚ್ಚಿ
ಬೆತ್ತಲು ಕಾಣದಂತೆ ಹೊದ್ದಿಸಿ
ಕಾಮನ ಮುದ್ರೆಯ ಕಂಡು
ನಿಮಗೆ ನೋವಾದೀತೆಂದು ಮುಚ್ಚಿದೆ
ಎಂದಳೆಂದು ಬರೆದು
ಯಾರಿಗೂ ನೋವಾಗದಂತೆ

ತಿಳಿಯದು ಅವರಿಗೆ
ಬತ್ತಲೆ ಎಂದರೆ ಬತ್ತಲಲ್ಲ
ಕೂದಲ ಹೊದಿಕೆಯಲ್ಲ
ಪಂಚಾಗ್ನಿಗೆ ಮೈಯೊಡ್ಡಿ
ಚಳಿಗಾಳಿಗೆ ಮನಸ್ಸೊಡ್ಡಿ
ಯಾರು ಎಲ್ಲಿ ಕೈಯಿಕ್ಕಿದರೂ ಪರೀಕ್ಷೆಗೆ
ದೃಢವಾಗಿ ಕಾಡದಿರಣ್ಣ ಎಂದು ತಡೆದು ನಿಲ್ಲಿಸಿ
ದಾಪುಗಾಲಿನಲ್ಲಿ ನಡೆದವಳು

ಮುಚ್ಚಬೇಡಿ ಅವಳಂಗವನ್ನು
ಎಲ್ಲವನ್ನೂ ಬಿಚ್ಚಿಟ್ಟವಳನ್ನು
ಹೆಣ್ಣಿನ ದೇಹಕ್ಕೆ ಕಂಗಾಲಾಗುವ
ಗಂಡುಗಳ ಲೆಕ್ಕಿಸದೇ ನುಡಿದು
ಒಲೆಯೊಳಗಿಕ್ಕಿ ನಡೆದವಳನ್ನು

ಅಷ್ಟು ಸುಲಭಕ್ಕೆ ಬಚ್ಚಿಡಲಾರಿರಿ.