ಸವಿತಾ ನಾಗಭೂಷಣ

ನನ್ನಜ್ಜಿ ನನ್ನಮ್ಮನಿಗೆ ನೀಡಿದ ಒಡವೆ
ನನ್ನಮ್ಮ ನನಗೆ ನೀಡಿದ ಒಡವೆ
ನಾನು ನನ್ನ ಮಗಳಿಗೆ…
ಅವಳು ಅವಳ ಮಗಳಿಗೆ…..
ದಾಟಿಸಬೇಕಾದ ಒಡವೆ….

ಅಭಿಮಾನದ ಒಡವೆ
ಅಪರೂಪದ ಒಡವೆ….
ಹೊಟ್ಟೆ ಹಸಿದು ಬೆವರ ಬಸಿದು
ಸಂಪಾದಿಸಿದ ಒಡವೆ !

ರಕುತದೊಳಗೆ ಶಕುತಿಯಾಗಿ
ಉಸಿರಿನೊಳಗೆ ಭಕುತಿಯಾಗಿ
ಮೂಡಿದಂಥಾ ಒಡವೆ…

ದೈವವೊಂದು ಒದಗಿ ಬಂದು
ನೀಡಿದ ಅಭಯ ಒಡವೆ….
ಸುರಿದು ಕೊಟ್ಟರೂ ಸಿರಿಯ
ನೀಡಲಾರೆ…ಮಾರಲಾರೆ….
ಇದ್ದದೊಂದೇ ಇರುವುದೊಂದೇ…
ತಾಳಿಕೊಂಡು ಬಂದ ಒಡವೆ..!
ಬಾಳಿಕೊಂಡು ಬಂದ ಒಡವೆ….

ಕಷ್ಟ ಕಾಲದಲ್ಲೂ ಅಡವಿಡಲಾರೆ
ಅವನಿ ನನ್ನೊಡವೆ…!!