ಮೆಮರಿ ಕಾರ್ಡ್ ಗೆ ಧಕ್ಕೆಯಾಗಿದೆ..

ಸಂಧ್ಯಾರಾಣಿ

ದಿನ ಮುಗಿಯುತ್ತಿತ್ತು, ಬೆಳಕು ಮಿಣಮಿಣ

ಮೊಬೈಲ್ ನ ಕಂಠದಲ್ಲಿ ಕ್ಷೀಣ ಉಸಿರಾಟ

ಅದರ ಎದೆಯಲ್ಲಿ ನಿರಂತರ ಹೊಕ್ಕಳಬಳ್ಳಿ

ಅಲ್ಲಿ ಎಲ್ಲವೂ ನಿತ್ಯ ಜನನ, ನಿತ್ಯ ಮರಣ

ಹೊಕ್ಕಳಬಳ್ಳಿಗೆ ಜೋತುಬಿದ್ದದ್ದು ಜೀವದ ಆಸೆಯಲ್ಲಿಯೇ

ಯಾವ ಗಳಿಗೆಯಲ್ಲಿ ಇಟ್ಟ ಹೆಜ್ಜೆ ತೊಡರಿತೋ

ಬಳ್ಳಿಕಡಿದು ಫೋನು ನೆಲಕ್ಕೆ

ಓಡಿಬಂದೆ, ಕೈಗೆತ್ತಿಕೊಂಡೆ, ಎದೆ ಬಡಿತ ನೋಡಿದೆ

ಇತ್ತು ಜೀವ ಇತ್ತು, ನೆಮ್ಮದಿಯ ನಿಟ್ಟುಸಿರಿಡುವುದರಲ್ಲಿ

ಬಿಳಿಹಾಳೆಯ ಮೇಲಿನ ಕರಿಬರಹ

ಮೆಮರಿ ಕಾರ್ಡ್ ಗೆ ಧಕ್ಕೆಯಾಗಿದೆ, ಫಾರ್ಮಾಟಿಸಿ ನಂತರ ಬಳಸಿ

ಸಾಧ್ಯವೇ ಹಾಗೆ ಎಲ್ಲವನೂ ಒತ್ತಿಟ್ಟು ಒರೆಸಿ

ಮತ್ತೆ ಸಿದ್ಧವಾಗುವುದು, ಹೊಸತನ್ನು ಕರೆಯಲು

ಶಿವತಾಂಡವದ ಜೊತೆಯಲ್ಲಿಯೇ ಲಲಿತೆಯ ಆಲಾಪ

ಅಳಿಸಬಹುದೇ ಕಣ್ಣುಗಳ ಮೌನಸ್ಪರ್ಶ? ಅಂಗೈಯಲ್ಲಿ ಉಳಿದಿದೆ

ನಿನ್ನ ಕಣ್ಣೆವೆಗಳ ಕನಸು, ಕೊಡವಿಬಿಡಲೇ ಕೈಯನ್ನು

ಕತ್ತಿನ ಮೇಲೆ ಸುಳಿಯುವ ಬಿಸಿಉಸಿರ ವಿಳಾಸ ನನ್ನದೇ, ನಿನ್ನದೆ?

ಬರೆದದ್ದನ್ನು ಅಳಿಸಬಹುದು, ಅಂದಿದ್ದನ್ನು ಮರೆಯಬಹುದೆ

ಮೊಣಕಾಲೂರಿ ಕೈ ಚಾಚಿದ ದೈನ್ಯ, ಬೊಗಸೆಗೆ ಬಿದ್ದ ಸುಡುಕೆಂಡ

ಪದಗಳ ಜಾಣತನ, ಕೈಗಳಿಂದ ಜಾರಿದ ಬೆರಳುಗಳು

ತಾಕಿದ, ನೇವರಿಸಿದ, ಆವರಿಸಿದ ಎವೆಗಳು

ಮೆಮರಿ ಕಾರ್ಡಿಗೆ ಧಕ್ಕೆಯಾಗಿದೆ, ಫಾರ್ಮಾಟಿಸಬೇಕಿದೆ…. ಮತ್ತೊಮ್ಮೆ

ಏನೇನಿತ್ತು ನೆನಪಿನ ಸಂಚಿಯಲ್ಲಿ?  ತೆಗೆದಿಟ್ಟ ಚಿತ್ರ

ಒಂದು ಮಳೆಯಲ್ಲಿ ದಕ್ಕಿದ್ದ ಒದ್ದೆ ರಾಗದ ನೆನಪು,

ಕನಸಿನಲಿ ಕೇಳಿದ್ದ ಹಾಡು, ಮಡಿಲಲ್ಲಿ ಮಲಗಿದ್ದ ಜೋಗುಳ

ಅರ್ಧ ಬರೆದ ಕವಿತೆ, ಚರಣವಾಗದ ಒಂದು ಪಲ್ಲವಿ

ಎಷ್ಟೊಂದು ನಿನ್ನೆಗಳು ಒಂದು ಪುಟ್ಟ ಎದೆಯಲ್ಲಿ

ಸ್ಲೇಟಿನ ಬರಹವನ್ನು ಹೊಸ ಆರಂಭದ ಹುಮ್ಮಸಿನಲ್ಲಿ

ಅಳಿಸುತ್ತಿದ್ದ ಬಾಲ್ಯವೇ ಎಲ್ಲಿ ಕಳೆದುಹೋದೆ?

ನೆಲಕ್ಕೆ ಕುಸಿದ ಎದೆಯ ಒಂದು ತಕ್ಕಡಿಯಲ್ಲಿ ನಿರಾಕರಣೆಗಳು

ಇನ್ನೊಂದು ತಟ್ಟೆಯಲಿ ಉಳಿದ ನಾಳೆಗಳು

ಈಗೀಗ ತಟ್ಟೆಗಳು ಯಾಕೆ ಹತ್ತಿರಾಗುತ್ತಿಲ್ಲ?

ಮೆಮರಿ ಕಾರ್ಡಿಗೆ ಧಕ್ಕೆಯಾಗಿದೆ, ಫಾರ್ಮಾಟಿಸಬೇಕಿದೆ…. ಮತ್ತೊಮ್ಮೆ

ಸಿಕ್ಕಬಹುದೆ ಬಿಡುಗಡೆ ಒದಗಿಬರದ ಆಣೆಭಾಷೆಗಳಿಂದ

ಕೊಡವಿಕೊಳ್ಳಬಹುದೆ ಬೆನ್ನಮೇಲಿನ ಹೊರೆಗಳಿಂದ

ಅಂಗಡಿಯವ ಹೇಳುತ್ತಾನೆ, ’ಎಲ್ಲಾ ಅಳಿಸಿಬಿಟ್ಟರೆ ಮತ್ತೆ

ಬಳಕೆಗೆ ಬಂದರೂ ಬರಬಹುದು. ಅಳಿಸುವುದಿಲ್ಲವೆಂದರೆ

ಬಳಸಲಾಗುವುದಿಲ್ಲ. ಹೋದದ್ದು ಬಿಡಿ, ಆದರೆ

ಬ್ಯಾಕ್ ಅಪ್ ಇಟ್ಟುಕೊಳ್ಳಬೇಕಿತ್ತಲ್ಲವೇ?’

ಎಲ್ಲಿ ಸಿಗಬಹುದು ಮಾರಾಯ ಭರವಸೆಗಳಿಗೆ ಬ್ಯಾಕ್ ಅಪ್

ಬಿದ್ದ ಫೋನು ಮುರಿಯದೆ, ಹನಿ ಕಣ್ಣು ಮೀರದೆ

ಆಕ್ರಂದನ ದನಿಯಾಗದೆ ನೆನಪುಗಳು ಸಾಯಬಹುದು

ಮೆಮರಿ ಕಾರ್ಡಿಗೆ ಧಕ್ಕೆಯಾಗಿದೆ, ಫಾರ್ಮಾಟಿಸಬೇಕಿದೆ…. ಮತ್ತೊಮ್ಮೆ