ವೆಂಕಟೇಶ ಚಾಗಿ

ವರುಷದಲ್ಲಿ 

ಆಗಾಗ ಬರುತ್ತಿದ್ದ ಮಳೆ

ತನ್ನ ಕಂದಮ್ಮಗಳಿಗೆ

ಇಡೀ ವರುಷಕ್ಕೆ ಬೇಕಾಗುವಷ್ಟು ಹಾಲನ್ನು

ಅಲ್ಲಿ ಇಲ್ಲಿ ಭೂತಾಯಿ ಒಡಲಲ್ಲಿ

ಶೇಖರಿಸಿ ಬಚ್ಚಿಟ್ಟು ಹೋಗುತ್ತಿದ್ದಳು;

ಮಳೆ ಬಂದಾಗಲೂ ಕಂದಮ್ಮಗಳಿಗೆ ಖುಷಿ

ಮಳೆಯ ನಂತರವೂ ಕಂದಮ್ಮಗಳಿಗೆ ಖುಷಿ

ವರುಷ ಪೂರ್ತಿ ಉಂಡು ಬೆಳೆದ ಕಂದಮ್ಮಗಳು 

ನೂರಾರು ಸಾವಿರಾರು 

ಬೆಟ್ಟಗಳೇ ಬಟ್ಟೆ ತೊಟ್ಟು ಸಂಭ್ರಮಿಸುವಷ್ಟು

ಮಿಕ್ಕ ಸಿಕ್ಕ ಹಾಲೆಲ್ಲಾ ಹರಿದು ಹರಿದು

ಜಗವ ತಣಿಸಿ ಸೇರಾಯ್ತು ಸಾಗರವನ್ನು;

ಆಗಾಗ ಮುನಿಸಿಕೊಳ್ಳುತ್ತಿದ್ದ ಮಳೆ

ಮರಳುವುದು ಆಗಲೋ ಈಗಲೋ

ಅದರೂ ಅವಳಡಗಿಸಿಟ್ಟ  ಅಮೃತವು

ಬೆಟ್ಟದ ಜೀವಗಳಿಗೆ ಜೀವಾಮೃತ;

ಕಂದಮ್ಮಗಳಿದ್ದಲ್ಲಿ 

ಅವಳ ಕರುಣೆ ಅಘಾದ ಅಪರಿಮಿತ

ಅವಳ ಬದುಕಿನ ಆಸೆ ಕಂದಮ್ಮಗಳ ಬದುಕೇ

ಅಲ್ಲವೇ.

ಯಾವುದೋ ಬಯಲೊಳಗಿದ್ದ ಅವನು

ಬಿಲಕೊರೆದು ಅಗೆದು ಬಗೆದು ಬಂದಿದ್ದಾನೆ

ತನ್ನ ಆಸೆಗಳನ್ನು ಬಿತ್ತಲು

ಬೆಟ್ಟಗಳುಟ್ಟ ಬಟ್ಟೆಯ ಕದಿಯಲು

ಮತ್ತೆ ಬಚ್ಚಿಡಲಾದ ಅಮೃತ ;

ಈಗ ಎಲ್ಲವನ್ನೂ ಕದಿಯಲಾಗುತ್ತಿದೆ

ಎಲ್ಲರಿಗೂ ಗೊತ್ತಾಗುವಂತೆ

ಎಲ್ಲರೂ ಹಟಬಿದ್ದವರಂತೆ

ಎಲ್ಲರಿಗೂ ಅನಿವಾರ್ಯವೆನ್ನುವಂತೆ;

ಕಂದಮ್ಮಗಳ ಆಕ್ರಂದನ 

ಮುಗಿಲು ಮುಟ್ಟಿದೆ

ಮಳೆ ಸಿಟ್ಟಾಗಿ ಹುಚ್ಚಿಯಂತಾಗಿದೆ

ಕದಿಯಲು ಬಂದವನ ಆಸೆಯನು ಪೂರೈಸಲು

ಕದಿಯುವವನ ಮನೆ ನುಗ್ಗಿ ಹೋಗಲಾಗಿದೆ

ಮಡಿದ ಕಂದಮ್ಮಗಳ ಆಕ್ರಂದನಕೆ 

ಬೆಟ್ಟಗಳೇ ಬಯಲಾಗುತಿವೆ

ಸಿಟ್ಟು  , ಸಿಟ್ಟುಗಳ ಉಂಡು ಬೆಟ್ಟವಾಗಿದೆ

ಈಗ ಎಲ್ಲವನ್ನೂ ಬಿಟ್ಟು ಬಿಡಲಾಗಿದೆ

ಯಾರಿಗೂ ಕ್ಷಮೆಯಿಲ್ಲ

ಆದರೆ ಮಳೆಯ ಪಾಠ

ಮತ್ತದೇ ಮಳೆಯ ಹಾಡು 

ಅಧಿಕೃತವಾಗಿ ಮಳೆಯ ಪಾಠ..!