ಶಿವಾಜಿ ಪ್ರವೀಣ್ 

ಕಣ್ಣರಳಿಸಿ ಮೈಯೆಲ್ಲ ಕಿವಿಯಾಗಿಸಿ

ನಡೆದರೆ

ಮಣಗಟ್ಟಲೆ ಕಥೆ ಸಿಗುವುದು

ಮಾರುಕಟ್ಟೆಯಲಿ..
……………………………..

ಮರಳು ಮೂಟೆ ಹೊತ್ತವಳ

ಮುಂಗುರಳ ನೋಡಲು

ಗಾಳಿ ತವಕಿಸುತ್ತಿತ್ತು..
………………………………

ಯಾರದೋ ಮನೆಗೆ

ಇಟ್ಟಿಗೆ ಹೊರುತ್ತಿದ್ದಾಳೆ

ಜೋಪಡಿಯಲ್ಲಿ ಆಡುತ್ತಿರುವ ಕಂದನಿಗಾಗಿ..
……………………………….

ಏಕಾಂಗಿಯ ಒದ್ದಾಟ

ನೋಡಲಾಗದೆ

ಹಲ್ಲಿ ಲೊಚಗುಟ್ಟುತ್ತಿದೆ
……………………………

ಗೋಡೆಗಂಟಿದ ಹಲ್ಲಿಯ

ಗೆಳೆತನ ಸಿಗುವುದು

ಏಕಾಂಗಿಗಷ್ಟೇ..
……………………………

ಎಚ್ಚರವಿಲ್ಲದವನಂತೆ

ಮಲಗಿದವನ ಕಂಡು

ಕನಸು ನಗುತ್ತಿತ್ತು
……………………………

ಗಾಳಿಗೆ ದೀಪವಾರಿದಾಗ

ಕತ್ತಲಿಗೆ ಅಮ್ಮ ಬೆಚ್ಚಿದಳು..

ಬದುಕಿಗೆ ಕಗ್ಗತ್ತಲು ಕವಿದಾಗ

ಹೆದರಲಿಲ್ಲ.
………………………….

ಹೊಸ ಚಪ್ಪಲಿಯ ಬಳಿ

ಅಂಗಾಲು

ಹಳೆ ಚಪ್ಪಲಿಯ ಕತೆ ಹೇಳುತ್ತಿದೆ

…………………………………

ನೂರಾರು ಮೈಲಿ ನಡೆದವನೊಬ್ಬ

ಕಾಲು ತೊಳೆದ

ಪಾದ ಧೂಳು ಎರಡಕ್ಕೂ

ವಿದಾಯದ ನೋವು.
…………………………………..

ಏನನ್ನೋ ಕಳೆದುಕೊಂಡವನಂತೆ

ಹುಡುಕುತ್ತ ಹೊರಟವನು

ಮಗುವಿನ ನಗು ಕಂಡು

ಸುಮ್ಮನೆ ನಿಂತ.
……………………………….

ಬಾನ ಚುಕ್ಕಿಗಳ ತೋರಿಸಿ

ಅಕ್ಕ ಹೇಳಿದಳು..

ನೋಡೋ ತಮ್ಮಾ

ನಕ್ಷತ್ರ ಮಲ್ಲಿಗೆ ಆಕಾಶದಲ್ಲಿ
…………………………………….

ಕೆಸರಲ್ಲಿ ಹಾವು ಹರಿಯುತ್ತಿದೆ

ತನ್ನ ಚಿತ್ರವನ್ನ

ತಾನೇ ಬಿಡಿಸುತ್ತ
……………………………..

ಗುಮ್ಮನಿಂದ ರಕ್ಷಿಸಲು

ಅಮ್ಮ ಬಳಸಿದಳು

ಸೆರಗನ್ನ..

…………………………….

ಹರಿದ ಚಾದರವ ಹೊದಿಸಿದಳು

ಅಮ್ಮ ಕಂದನ ಮೊಗ

ಚಂದಿರನಿಗೆ ಕಾಣಲೆಂದು