ಮಣ್ಣಿನಂಗಳದ ಮಗು

ಸಂಗೀತ ರವಿರಾಜ್

ಅಲ್ಲೊಂದು ಕೇರಿ
ಡೋಲು, ತಮಟೆ, ನಗಾರಿಗಳು
ಸರಹದ್ದುಗಳ ಮೀರಿ

ಗುಡಿಸಿ ಗುಡಿಸಿ ನುಣ್ಣಗಾದ ಮನೆಯಂಗಳದಿ
ಇಹಪರದ ಇರುವಿಕೆಯಿಲ್ಲದ ಮಗುವಿನಾಟಕ್ಕೆ
ಈ ಸದ್ದುಗಳು ದಣಿದಿವೆ.

ಕಾಲ ಕಾಲವು ಕಳೆದು
ಏನೊಂದು ಬದಲಾವಣೆಲ್ಲದ
ಡೋಲಿನ ಲೋಕದ ಬದುಕು
ಡೋಲಾಯಮಾನ ಅಲ್ಲವೇ ಅಲ್ಲ
ಎಂಬ ಎದೆಯೊಳಗಿನ ನಂಬಿಕೆ

ತಲೆಮಾರುಗಳು ಈ ನಂಬಿಕೆಯ ಉಳಿಸಿ
ಜೊತೆಗೆ ಜ್ಞಾನ ವನ್ನು ಗಳಿಸಲಿ
ಇದು ದುಡಿ ಕುಣಿತದ ಜಗತ್ತಿನಲ್ಲಿ
ಬೇಲಿ ಹೂಗಳ ಆಯ್ದು ಕಟ್ಟುವ ಕೆಂದುಟಿಗಳ ಕನಸು….
ಜೊತೆಗೆ ನಮ್ಮೆಲ್ಲರದ್ದು ಹೌದು.

ಕುಲಕಸುಬಿಗೊಂದು ಜೀವ ಕೊಡುವ ಮಗು
ಡೋಲು ಬಡಿದೆ ತೀರುತ್ತದೆ
ಅಥವ
ಮಗು ಡೋಲು ಬಡಿಯಲೇ ಬೇಕು
ಎಂದೆನಿಸಿದ ಅಪ್ಪನ ಸಂತೃಪ್ತಿಯಲ್ಲು
ತೃಪ್ತಿ ಕಾಣದ ಕಂಗಳು

ಮಣ್ಣಿನಂಗಳದ ಮಗುವಿನ ಮುಂದೆ ಡೋಲನಿಟ್ಟರೆ
ಬಾರಿಸಲೊಪ್ಪದ ಆ ಕೂಸು
ಕಿವಿಗಚ್ಚುವ ಡೋಲು ಸದ್ದಿಗು ಎದ್ದೇಳುತ್ತಿಲ್ಲ!
ಪಕ್ಕದ ಶಾಲೆಯ ಗಂಟೆಯ ಶಬ್ದಕ್ಕೆ
ಸದ್ದಿಲ್ಲದೆ ಧಾವಿಸುತ್ತಿದೆ…!