ಆಟಾಟೋಪ

-ಮುಕುಂದಾ

ಕುಟುಕ ಬೇಡ ಕೆದಕಿ ಕೆದಕಿ
ಇನ್ನು ಮಾದಿಲ್ಲ ಹುಣ್ಣು
ನೊಂದ ಜೀವಗಳ ನಿಂದಿಸಬೇಡ

ಮುಲಾಮು ಹಚ್ಚಿಲ್ಲವೆಂದರೆ
ಚಿಂತೆಯಿಲ್ಲ
ಉಪ್ಪು ಖಾರ ಚಿಮುಕಿಸಬೇಡ

ಹಲ್ಕಚ್ಚಿ ನೋವ ನುಂಗಿ
ಸಾಗಿರಲು ಹೆಂಗೋ
ಗಾಯದಮೇಲೆ ಬರೆ ಎಳೆಯಬೇಡ

ಕತ್ತಲೆಯ ಬದುಕಲ್ಲಿ ಪುಟ್ಟ
ಮಿಣುಕೊಂದಿಹುದು
ಊದ ಬೇಡ ಊದಿ ಆರಿಸಬೇಡ

ಜ್ಞಾನದಾ ಬೆಳಕಲ್ಲಿ ಅರಳಲಿ
ಮನುಷ್ಯತ್ವ
ಮೌಢ್ಯ ಬಿಟ್ಟೆದ್ದು ಮಮತೆ ಹಿಡಿದೆತ್ತು

ಕಾಲ ಅಕಾಲ ಎಲ್ಲ ಅವನ ಆಟ
ಕಾಡಿ ಬೇಡಲ್ಲ ಕಷ್ಟ
ಕಾರುಣ್ಯ ಮೆರೆದು ಕಳಚು ಅಂಧತ್ವ

ಒಲವ ತೋರು ಆಗೊಮ್ಮೆಈಗೊಮ್ಮೆ
ಒಡಲ ಅನುಬಂಧ
ಒದ್ದು ಬಿಡಬೇಡ ನಲ್ಮೆಯಸಂಗ

ಕರೆದು ಮಾತಾಡು ಮೌನ ಬಿಟ್ಟೆದ್ದು
ಕಳೆದುಹೋಗುವ ಮುನ್ನ
ಕರೆದೊಡನೆ ಅವ, ಮುಗಿಯಿತೆಲ್ಲ ಆಟಾಟೋಪ……