ಹಿಂದಿ ಮೂಲ : ಬಚ್ಚಾ ಲಾಲ್ ‘ಉನ್ಮೇಶ್’
ಕನ್ನಡಕ್ಕೆ : ಸಿಕಂದರ್ ಅಲಿ, ತೋರಣಗಲ್ಲು

ಯಾವ ಜಾತಿಯೋ ತಮ್ಮ?
“ನಾನು ದಲಿತ, ಸಾಹೇಬ್ರೆ!”

ಅಲ್ಲಾ… ಅಂದರೆ, ನೀನು ಯಾವುದರಲ್ಲಿ ಬರುತ್ತೀಯಾ ?
ನಾನು ನಿಮ್ಮ ಬೈಗಳಲ್ಲಿ, ನಿಂದನೆಗಳಲ್ಲಿ ಬರುವವನು.
ನಾನು ಕೊಳಕು ಚರಂಡಿಗಳಲ್ಲಿ ಬರುವವನು
ಜೊತೆಗೆ ಪ್ರತ್ಯೇಕವಾಗಿಟ್ಟ ಊಟದ ತಟ್ಟೆಗಳಲ್ಲಿ ಬರುವವನು ಸಾಹೇಬ್ರೆ

ನೀನು ಹಿಂದೂಗಳಲ್ಲಿ ಬರುತ್ತೀಯಾ ಅಂದುಕೊಂಡಿದ್ದೆ ?
ಬರುತ್ತೀನಲ್ಲಾ ಸಾಹೇಬ್ರೆ… ಆದರೆ ನಿಮ್ಮ ಚುನಾವಣೆಗಳು ಬಂದಾಗ.

ಏನು ಉಣ್ಣುತ್ತೀಯಾ ?
ಒಬ್ಬ ದಲಿತ ಉಣ್ಣುವುದನ್ನೆ ಉಣ್ಣುತ್ತೇನೆ ಸಾಹೇಬ್ರೆ

ಅಲ್ಲಾ… ನನ್ನ ಅರ್ಥ ಏನು ತಿನ್ನುತ್ತೀಯಾ ಅಂತ ?
ನಿಮ್ಮಿಂದ ಒದೆಗಳು ತಿನ್ನುತ್ತೇನೆ
ಸಾಲಗಳ ಭಾರ ತಿನ್ನುತ್ತೇನೆ
ಹಾಗೆ ಹಣದ ಬಿಕ್ಕಟ್ಟಿನಲ್ಲಿದ್ದಾಗ ಉಪ್ಪು ಒಮ್ಮೊಮ್ಮೆ ಉಪ್ಪಿನಕಾಯಿ ತಿನ್ನುತ್ತೇನೆ ಸಾಹೇಬ್ರೆ

ನಾನು ಕೋಳಿ ಮಾಂಸ ತಿನ್ನುತ್ತೀಯಾ ಅಂದುಕೊಂಡಿದ್ದೆ
ತಿನ್ನುತ್ತೇನಲ್ಲಾ ಸಾಹೇಬ್ರೆ… ಆದರೆ ಚುನಾವಣೆಗಳು ಬಂದಾಗ.

ಏನು ಕುಡಿಯುತ್ತೀಯಾ ?
ಒಬ್ಬ ದಲಿತ ಕುಡಿಯುದನ್ನೇ ಕುಡಿಯುತ್ತೇನೆ ಸಾಹೇಬ್ರೆ

ಅಲ್ಲಾ.. ನನ್ನರ್ಥ ಏನೇನು ಕುಡಿಯುತ್ತೀಯಾ ?
ಅಸ್ಪೃಶ್ಯತೆಯ ದುಃಖ
ಒಡೆದುಹೋದ ಕನಸುಗಳ ಉಸಿರು
ಹಾಗೆ ಬೆತ್ತಲ ಕಣ್ಣುಗಳಿಂದ ನೋಡಬಹುದಾದ ಭ್ರಮೆ ಸಾಹೇಬ್ರೆ

ನಾನಂದುಕೊಂಡೆ ಶರಾಬು ಕುಡಿಯುತ್ತೀಯಾ ಎಂದು ?
ಕುಡಿಯುತ್ತೇನಲ್ಲಾ ಸಾಹೇಬ್ರೆ.., ಆದರೆ ನಿಮ್ಮ ಚುನಾವಣೆಗಳಲ್ಲಿ

ಏನು ಸಿಕ್ಕಿತೋ ತಮ್ಮ ?
ದಲಿತರಿಗೆ ಸಿಕ್ಕಿದ್ದು ಸಾಹೇಬ್ರೆ

ಅಲ್ಲಾ… ನನ್ನರ್ಥ ಏನೇನು ಸಿಕ್ಕೀತು ?
ಅವಮಾನದಿಂದ ಕೂಡಿದ ಜೀವನ
ನೀವು ಬಿಟ್ಟು ಹೋಗುವ ಕೊಳಕು
ಇದಲ್ಲದೆಯೂ… ನಿಮ್ಮಂತಹ ಪರಾವಲಂಬಿಗಳ ಗಲಾಮಿತನ ಸಾಹೇಬ್ರೆ.

ನನಗನಿಸಿತು ಭರವಸೆಗಳು ಸಿಕ್ಕಿವೆಯೆಂದು ?
ಸಿಗುತ್ತವಲ್ಲಾ ಸಾಹೇಬ್ರೇ.. ಆದರೆ ನಿಮ್ಮ ಚುನಾವಣೆಗಳಲ್ಲಿ

ಏನು ಮಾಡಿದೆಯೋ ತಮ್ಮ ?
ಒಬ್ಬ ದಲಿತ ಮಾಡುವುದು ಸಾಹೇಬ್ರೆ

ಅಲಾ.. ನನ್ನರ್ಥ ಏನೇನು ಮಾಡಿದ್ದೀಯಾ ?
ನೂರು ದಿನಗಳ ಕಾಲ ಕೆರೆಯಲ್ಲಿ ಕೆಲಸ ಮಾಡಿದೆ
ಬೆಳಿಗ್ಗೆ ಮತ್ತು ಸಂಜೆ ಬೆವರಿನಿಂದ ತೋಯ್ದು ಕಳೆದೆ
ಮತ್ತು ಹೋಗುತ್ತಾ ಬರುತ್ತಾ ಗೌಡರಿಗೆ ಸಲಾಮು ಹೊಡೆಯುವುದು ಸಾಹೇಬ್ರೆ

ನಾನೇನೋ ದೊಡ್ಡ ಕೆಲಸ ಮಾಡಿದ್ದೀಯಾ ಎಂದು ಭಾವಿಸಿದೆ.
ಮಾಡಿದ್ದೇನಲ್ಲಾ ಸಾಹೇಬ್ರೆ.. ನಿಮ್ಮ ಚುನಾವಣೆಗಳ ಪ್ರಚಾರ