ಸದಾಶಿವ್ ಸೊರಟೂರು

ಊರಿಗೆ ದಾರಿ
ಯಾರು ತೋರಿದರೇನು?
ಎನ್ನುವ
ಜಿಪಿಎಸ್ ನಂತಹ ಮಾತಿನಲ್ಲಿ
ನನಗೆ ಆಸಕ್ತಿಯಿಲ್ಲ

ದಾರಿ ತೋರಿ ಹೋದವನ
ಆ ದಾರಿಯಲಿ
ಬಹಳಮಾಡಿ ಏನುಂಟು?
ಗರಿಕೆಯೇ ಇಲ್ಲದ ಮಣ್ಣು ನೆಲ
ಇಲ್ಲವೇ ಡಾಮರು ರಸ್ತೆ
ಪಕ್ಕಕ್ಕೆ ಸವರಿದ ಬೇಲಿ ಸಾಲುಗಳು

ಊರು ಸೇರಬಹುದಷ್ಟೆ
ಆದರೆ
ಊರು ಸೇರುವುದೊಂದೇ
ಬದುಕಲ್ಲ!

ಕುದುರೆಯೂ ಸಾಗುತ್ತದೆ
ಕಣ್ಣುಕಟ್ಟಿಕೊಂಡು
ಸಾಗುವ ಸಿದ್ದ ದಾರಿಯೊಂದಿದ್ದರೆ

ಜಿಪಿಎಸ್ ನ ಹುಡುಗಿ
ದಾರಿಯಲಿ ನೀನು ಕಳೆದು
ಹೋಗಬೇಕೆಂದರೂ ಬಿಡುವುದಿಲ್ಲ

ಯಾರೊ ತೋರಿದ ಹಾದಿಯನು
ನೀನಾಗಿಯೇ ತಪ್ಪುವ ಧೈರ್ಯವೂ
ಮಾಡುವುದಿಲ್ಲ!

ಅತ್ತ ಆ ತುದಿಯಲಿ
ಏನಿದೆ ಎಂದು ಸ್ವತಃ ದಾರಿಗೂ
ತಿಳಿಯದ
ಯಾರೂ ತೋರದ ಹಾದಿಯಲಿ
ಪಾದಗಳನೊಮ್ಮೆ
ಊರಿ ನೋಡು

ಹೆಜ್ಜೆ-ಹಜ್ಜೆಗೂ ಒಲವು
ನಿಗೂಢ ನಾಳೆಗಳಂತ
ಚೆಲುವು!

ಸೇರುವುದಷ್ಟೇ ಗುರಿಯಲ್ಲ
ಸೇರುತ್ತಿರುವುದು ಗುರಿಯೇ!