ಸ್ವರ್ಗದಿಂದ ಮತ್ತೊಂದು ಜಾರಿಕೆ

(ಮೂಲ ಹಿಂದಿ- ಗಿರಧರ್ ರಾಠೀ )

ಅನುವಾದ – ಸಿ ವಿ ಶೇಷಾದ್ರಿ ಹೊಳವನಹಳ್ಳಿ

1 ದೇವತೆಗಳಂತೆ ಅವರು ಮೃತ್ಯುಲೋಕದಿಂದ ಬರುತ್ತಾರೆ. ರಾಕ್ಷಸರಾಗುತ್ತ ಹೊರಟುಹೋಗುತ್ತಾರೆ. ಅರ್ಧ ದೇವತೆ ಅರ್ಧ ರಾಕ್ಷಸ ಇದು ಸ್ವರ್ಗದಲ್ಲಿನ ಕಾನೂನು ಹಾಗೂ ವ್ಯವಸ್ಥೆಗಳ ವಿಡಂಬನೆ. ಮತ್ತೆ ಅವರು ಮೃತ್ಯ ಲೋಕಕ್ಕೆ ಲಾಯಕ್ಕಾಗುವುದಿಲ್ಲ. 2 ಸ್ವರ್ಗದಲ್ಲಿ ತುಪ್ಪದ ಬೆಟ್ಟಗಳಿದ್ದವು. ಹಾಲಿನ ಕಾಡಿತ್ತು. ಆನಂದದ ಬಿರುಗಾಳಿಯಿತ್ತು. ನಾವು ಮರೆತು ಬಂದಿದ್ದೆವು ಉಗುರು ಹಾಗೂ ಸ್ವಪ್ನಗಳನ್ನು. 3 ನಾರಿಯರು ದೇವಿಯರಾಗಿದ್ದರು. ಮನುಷ್ಯ ದೇವನಾಗಿದ್ದ, ಸ್ವರ್ಗದಲ್ಲಿ ಮಕ್ಕಳಿರಲಿಲ್ಲ. 4 ನಿಧಾನ ನಿಧಾನವಾಗಿ ಮನುಷ್ಯ ವಾಸನೆ ಕೊನೆಯಾಗುತ್ತಾ ಬರುತ್ತದೆ ಸ್ವರ್ಗದಲ್ಲಿ. ಸ್ವರ್ಗವು ಮತ್ತೊಂದು ಮೃತ್ಯುಲೋಕವಾಗುತ್ತಾ ಹೋಗುತ್ತದೆ.]]>