ಸೂರ್ಯಕೀರ್ತಿ

**

ಅವಳ ಕೇಳಿದೆ 

ನಿನಗೆ ತೃಪ್ತಿ ಬೇಕೆ ? ಎಂದು 

ಅವಳು ಕಣ್ಣುಗಳ 

ಅರಳಿಸಿ ನೋಡಿದಳು 

ಅದು ಲೈಗಿಂಕ ಸುಖವೋ

ಪ್ರೀತಿಸುವ ಸುಖವೋ

ಎನ್ನುವಷ್ಟರಲ್ಲಿ 

ವಸಂತಕಾಲ ಕಳೆದು 

ವಿರಹದ ಬೇಸಿಗೆ ಕಾಲ ಶುರುವಾಗಿತ್ತು.

ಮತ್ತೊಮ್ಮೆ ಅವಳ 

ಕೇಳಿದೆ,

ನಿನಗೆ ಪರಿಪೂರ್ಣ ತೃಪ್ತಿ ಬೇಕೆ ? ಎಂದೆ 

ಅವಳ ತುಟಿಗಳು ಬಿರಿದವು 

ಅಲ್ಲಿ ನಕ್ಷತ್ರಗಳು 

ಹೊಳೆದವು.

ಹುಣ್ಣಿಮೆಯ ರಾತ್ರಿ 

ಅವಳ ತೋಳುಗಳ ಹಿಡಿದು 

ಕೇಳಿಕೊಂಡೆ;

ನಿನಗೆ ತೃಪ್ತಿ ಇದೆಯೇ ಎಂದು 

ಪೂರ್ಣ ಚಂದ್ರನ ಕಡೆ 

ಕೈ ಬೀಸಿ ತೋರಿಸಿದಳು 

ಅವಳ ತುಟಿಗಳಿಗೆ 

ನನ್ನ ತುಟಿಗಳ 

ಸೇರಿಸಿದೆ – ಚಂದ್ರ ಅರ್ಧ ತುಂಡಾಗಿ 

ಅಮಾವಾಸ್ಯೆಯ ಕತ್ತಲು

ಆವರಿಸಿತು.

ಇನ್ನು ಕೇಳುತ್ತಲೇ ಇದ್ದೇನೆ 

ಅವಳು 

ಆಕಾಶವ ತೋರಿಸಿ 

ತಂಗಾಳಿಯ ರಹಸ್ಯಗಳ

ತೋರಿಸುತ್ತಲೇ ಇದ್ದಾಳೆ,

ನಾನು ಕೇಳುತ್ತಲೇ ಇದ್ದೇನೆ

ಪ್ರೇಮದ ವಸಂತಗಳನ್ನು 

ಕಳೆದು ವಿರಹದ 

ಚಳಿಗಾಲಗಳು ಬರುತ್ತಲೇ ಇವೆ.