ಸೂರ್ಯಕೀರ್ತಿ  

೧.

ಹರಿಯುವ ನೀರಿನ ಚಂಚಲತೆಯ
ಹಿಡಿದು ,ಒಂದು ಹೂಜಿಯಲಿ ತುಂಬಿ.
ಬೇಯುವ, ಕೊಳೆಯುವ ,ಕುದಿಯುವ
ಆಗ ತಾನೆ ಕಾಯಿಂದ ಹಣ್ಣಿಗೆ ಮಾಗುವ
ಹುಳಿದ್ರಾಕ್ಷಿಯ ಜಜ್ಜಿ ,
ನಿಲ್ಲದೆಯೇ ಓಡುವ ಆ ನೀರಲಿ
ಇಳಿದರೆ  ಮದ್ಯವಾಗುವುದಿರಲಿ ,
ನೊರೆ ಬಿಟ್ಟ ವಿಷಸರ್ಪದಂತೆ ಬುಸುಗುಡುವುದು
ಹಾವು ಹೂಜಿಯಲ್ಲಿ !

ಕುಡಿದವನಿಗೆ ಮತ್ತಿನ ಮುತ್ತಾಗಬಹುದು,
ಹರಿಯುವ ಜಲಪಾತಗಳಿಲ್ಲಿ
ತುಂಬುವವು
ಕಲ್ಲಿಗೆ ತಲೆ ಬಡಿಯುವಂತೆ !
ಈ ನೀರೇ ಹೀಗೆ
ನೊರೆ ಬಂದು ಹರಿಯುವ ತನಕ
ದಾರಿ ಕಾಣದು ಅನ್ನಬ್ರಹ್ಮವ ಕಕ್ಕಿಸುವ ತನಕ !

ಆ ಕಾಡ ಮರದ ಬುಡದಲ್ಲಿಯೂ ಕೂಡ
ಮದ್ಯ,
ನಿಂತ ನೀರಲಿ ಕೊಳೆತ ಎಲೆ,ಹೂ, ಮಣ್ಣು
ಹೀಚು,ಕಾಯಿ , ಹಣ್ಣು ,ಬೇರುಗಳ
ಮದ್ಯದ ವಾಸನೆ !

ಇಲ್ಲಿ ,
ಕುಡಿಯುವುದೆಲ್ಲ ಮದ್ಯ ,
ಕುಡಿಯದಿರುವುದೇ ಅಸಾಧ್ಯ !
ಕುಡಿಯದೇ ಇರುವವರು ಯಾರು ?
ದಾಹ ಬಂದ ಮೇಲೆ ,
ನೀರಾದರೂ ಸೈ,
ಮದ್ಯವಾದರೂ ಸೈ,
ರಕ್ತವಾದರೂ ಸೈ !

೨

ಅರಮನೆಗಳಲಿ ದೊಡ್ಡ ದೊಡ್ಡ ಗುಡಾಣಗಳ
ಮದ್ಯದ ಶೇಖರಣೆ ,
ದುಂಬಿ ಮದವೆದ್ದು ಹೂವಿಂದ ಹೂವಿಗೆ
ಹಾರಿ ಅತ್ಯಾಚಾರವೆಸದು
ಕುಡಿಯುವ ಮದ್ಯಕ್ಕೆ ಯಾರು ಶಿಕ್ಷೆ ಕೊಟ್ಯಾರು ?

ಹೂವು ದುಂಬಿಯ ಆಹ್ವಾನ ಕೊಟ್ಟು
ಕರೆಯುವುದೇ ?
ತನ್ನ ಯೌವನವ ಹೀರಿ ಬಿಸಾಕುವ
ಕ್ರೌರ್ಯಕ್ಕೆ ಸೌಂದರ್ಯವೆಂಬ ಹೆಸರೇ ?

ಛೇ!  ಎಂಥಾ ದೌರ್ಜನ್ಯ ,
ದುಂಬಿ ಹೂವಿನ ದಳ ಕಳಚಿ
ಮೈಯೆಲ್ಲ ಮುಟ್ಟಿ ಗುದ್ದಾಡುವ
ಬಗೆಯ ಗರ್ಭಪಾತವಲ್ಲದೇ ?
ಗರ್ಭಸೃಷ್ಠಿಯೇ ?

ಎಷ್ಟೋ ಹೂವಗಳ ಮೂಸಿ, ಕೆದರಾಡಿ ,
ಗುದ್ದಾಡಿ ಬಂದ ದುಂಬಿಗೆ ಪುರುಷನೆಂಬ ಬಿರುದು !?
ಯಾರು ಕೇಳುವವರು ಇಲ್ಲ
ರಂಭೆ ,ಊರ್ವಶಿ, ಮೇನಕೆಯ ಮೈ ನೋವುಗಳ!

ಪುರುಷ ಕಚ್ಚಿ ಗಾಯ ಮಾಡಿದ
ಸ್ತನ, ರಟ್ಟೆ, ತೊಡೆ, ತುಟಿ, ಮೂಗು
ಹಣೆ, ಹೊಕ್ಕುಳದಲ್ಲಿ ನಿಂತ ಕಪ್ಪು ರಕ್ತ !
ಇದಕ್ಕೆ ಯಾವ ಮದ್ಯವ ಕುಡಿಯಬೇಕು?

ಯಾವ ಸಂಗೀತವ ಪಾಡಬೇಕು ?
ಯಾವ ದೇಹವ ತೋರಿ ನಗಬೇಕು ?

೩

ಒಂದು ಹೂಜಿಯಲ್ಲಿ ಮದ್ಯ ,
ಮತ್ತೊಂದರಲಿ ರಕ್ತವ ಬಸಿದು
ಇಟ್ಟರು ,
ಮದ್ಯ ರಕ್ತವ ಕುಡಿಯುತಿತ್ತು ,
ರಕ್ತ ಮದದ ಮದ್ಯವ ಕುಡಿದು
ಮುಪ್ಪಾಗುತಿತ್ತು !

೪
ವಯಸ್ಸಾದ ಮುದಿಯ ಪುರುಷನಿಗೆ
ಬಾಯಿ ತುಂಬಾ ಕಾಮದ ಸಾರಾಯಿ !
ಚಿಗುರಲ್ಲೇ ಮೊಗ್ಗಾಗುವ ಹುಡುಗಿಗೆ ,
ಅರಳುವ ಹೂಗಳ ತೋರಿಸಿ,
ಭೋಗಿಸುವ ಅಪೇಕ್ಷೆ ಮುದುಕನಿಗೆ!

೫.
ಒಮ್ಮೊಮ್ಮೆ  ಕುಡಿಯುತ್ತಿದ್ದ ಕವಿ
ಸದಾ ಕುಡಿಯಲು ಶುರುವಾದಾಗ ಕಾವ್ಯದ ಕುಡುಕನಾದ ,
ಕವಿ ಕುಡುಕನಾಗುವುದೆಂದರೆ
ಹೂ – ಕಾಯಾಗುವುದು ಎಂದರ್ಥ !

೬.
ಎರಡು ಮೋಡಗಳು ಮದವೆದ್ದು
ತುಟಿಗೆ ತುಟಿಯ ಇರಿಸಿ
ಮುದ್ದಾಡುವಾಗ
ಹನಿ ಕಾವ್ಯವಾಯಿತು,
ಈ ಮದವೇ ಮದ್ಯವಾಯಿತು !