ಅರ್ಥಮಾಡಿಕೊಳ್ಳುವೆಯಾದರೆ!

ಕು.ಸ.ಮಧುಸೂದನ ನಾಯರ್, ರಂಗೇನಹಳ್ಳಿ

ಅಂತಹದೊಂದು ಉತ್ಕಟ ಪ್ರೇಮವ
ನೀನರ್ಥಮಾಡಿಕೊಳ್ಳುವೆಯಾದರೆ ಕಡು ಬೇಸಿಗೆಯಲೂ
ಸುರಿಯುವ ಮಳೆಗಾಗಿ
ಕಾದುಕೂತ ಧಾರಿಣಿಯ,
ಗಡಗಡಿಸುವ ಚಳಿಯ ಛಳುಕಿಗೂ
ಅಗ್ಗಿಷ್ಠಿಕೆಯಾಗಿ ಬರುವ ಮದ್ಯಾಹ್ನದ ಸೂರ್ಯನ
ನೀನು ನಿರಾಕರಿಸಲಾರೆ.
ಯಾವ ಪ್ರೇಮವೂ ದೈವೀಕವೆಂಬ ಹುಸಿಯ
ಮಾತಾಡದೆ
ಯಾವ ಕಾಮವೂ ಲೌಕಿಕದ ಮಾಯೆಯೆಂಬ ತಿರಸ್ಕಾರದ
ಮಾತಾಡದೆ
ಅದೊಂದು ಪ್ರೇಮವನೊಪ್ಪಿಕೊಳ್ಳುವಿಯಾದರೆ
ಶತಮಾನಗಳ ಶಾಪಗ್ರಸ್ತ ಜೀವವೊಂದು ಬಿಡುಗಡೆಯಾಗಿ
ಪಾಪದ ಕೂಪದೊಳು ಮಿಂದೆದ್ದ ಮನಸೊಂದು ಸ್ಪಟಿಕದಂತೆ ಶುಭ್ರವಾಗಿ
ಬಿಡುವೆ
ನಿನ್ನಿಂದ
ಮತ್ತು
ನಿನ್ನಿಂದ
ಮತ್ತು
ನಿನಗಾಗಿ ಮಾತ್ರ
ನಿಶ್ಚಿತ