ಸರೋಜಿನಿ ಪಡಸಲಗಿ
ಬೇಡ ಹೆಸರಿನ ಹಂಗು ಬಂಧ
ಕರಗಿ ಜಾರಿ ಹೋದೀತು ಸಿಗದೆ
ಜೀವ ತಂತಿಯ ಮೀಟುತಿರಲಿ
ಯಾರಿಗೂ ಎಟುಕದೆ ಗುಪ್ತಗಾಮಿನಿಯಾಗಿ
ಕಾರ್ಗತ್ತಲ ಗರ್ಭದಿಂದ ಥಟ್ಟನೆ
ಬೆಳಕಿನ ಹೊಳೆ ಹರಿದ ಹಾಗೆ
ಬಿಸಿಲ ಬೇಗೆ ಧಗೆಯ ನಡುವೆ
ಸುಳಿವ ತಂಪಿನ ಅಲೆಯ ಹಾಗೆ
ಇರಲಿ ಎಟುಕದೆ ಗುಪ್ತಗಾಮಿನಿಯಾಗಿ
ಎದೆ ತುಂಬಿದ ಹಾಡಿನಿಂಪಿನಂತೆ
ಕಣ್ಣ ತುಂಬಿದ ಕನಸು ಚಿತ್ರದಂತೆ
ಉಸಿರ ತುಂಬಿದ ಸೌಗಂಧದಂತೆ
ಆ ಅಂಚಿನ ಮುರಳಿ ನಾದದಂತೆ
ಇರಲಿ ಎಟುಕದೆ ಗುಪ್ತಗಾಮಿನಿಯಾಗಿ
ಮೌನದಲಿ ತುಂಬಿರುವ ನಾದವಾಗಿ
ಪ್ರತಿ ಮಿಡಿತದಿ ಹರಿವ ತುಡಿತವಾಗಿ
ಬಿಂಬ ಬಿಟ್ಟಗಲದ ಪ್ರತಿಬಿಂಬವಾಗಿ
ಹೆಸರಿನ ಹಂಗಿಲ್ಲದೆ ಜೀವದ ಜೀವವಾಗಿ
ಇರಲಿ ಎಟುಕದೆ ಗುಪ್ತಗಾಮಿನಿಯಾಗಿ
0 ಪ್ರತಿಕ್ರಿಯೆಗಳು