ಅಲ್ವಿದಾ 

‘ಅಲ್ಲಮ’ ಗಿರೀಶ ಜಕಾಪುರೆ

ಎಲೆಯ ಮೇಲಿನ ಇಬ್ಬನಿಯಂತೆ ಇದ್ದು ಹೋದ
ನಸುನಗುತ್ತಲೇ ಜಗದ ಮೋಹ ತೊರೆದು ಹೋದ

ಅವನ ಅಭಿನಯ ಎಂದೂ ನಟನೆ ಅನಿಸಲಿಲ್ಲ
ಇರುವಷ್ಟು ದಿನ ಎಲ್ಲರ ಮನಸು ಗೆದ್ದು ಹೋದ

ಕೊನೆಯುಸಿರಲ್ಲೂ ವಿನಯ ಮೆರೆದ ವಿನಯವಂತ
ಹೋಗಿರುವ ಸದ್ದೂ ಬರದಂತೆ ಎದ್ದು ಹೋದ

ವಿಧಿ ಬಲವಿರದಿರೆ ಹಸಿರೆಲೆಯೂ ಉದುರುತ್ತದೆ
ನಳನಳಿಸುವಾಗ ಕೊಂಬೆಯಿಂದ ಬಿದ್ದು ಹೋದ

ಎದೆಯಾಮೃತಶಿಲೆಗಳಲಿ ತನ್ನ ಬಿಂಬ ಕೊರೆದ
ಎಂದೂ ಅಳಿಯದಂತೆ ಹೆಸರನು ಬರೆದು ಹೋದ

ಚುಕ್ಕಿಗಳ ಕಣ್ಣು ಕೋರೈಸುವ ಬೆಳಕು ಮೀರಿದ
ಅಭೇಧ್ಯ ಮುಗಿಲಿನಲೂ ರಂಧ್ರ ಕೊರೆದು ಹೋದ

ಭಣಗೊಡುವ ಶಹರಿನಲಿ ಕೊನೆಯ ಯಾತ್ರೆ ‘ಅಲ್ಲಮ’
ವಿದಾಯ ಹೇಳಿ ರಂಗದ ಮರೆಗೆ ಸರಿದು ಹೋದ