ಹೆಣದ ಪಕ್ಕ ಮಲಗುವ ಯೋಗವಿನ್ನೂ ಒಲಿದಿಲ್ಲ
ವಿ.ಆರ್.ಕಾರ್ಪೆಂಟರ್
ರೈಲು ಬಸ್ಸಿನಲ್ಲಿ ಚಲಿಸುವಾಗ
ಹಾಗೆಯೇ ನಿದ್ರೆ ಆವರಿಸುತ್ತದೆ
ಕೊಳ್ಳುವ ವಸ್ತುಗಳು ಕಣ್ತಪ್ಪುವ
ಕಾರಣ ಸಂತೆಯೊಳು ನಿದ್ದೆ ಬರದು
ಪಕ್ಕ ಮಲಗಿದ ಜೀವದ ಉಸಿರಾಟವ
ಆಲಿಸಿ ನೆಮ್ಮದಿಯಾಗಿ ಮಲಗುವೆ;
ಹೆಣದ ಪಕ್ಕ ಮಲಗುವ ಯೋಗವಿನ್ನೂ ಒಲಿದಿಲ್ಲ
ನಾಯಿಗಳು ಬೊಗಳುವ ಸದ್ದು
ಮನುಷ್ಯರಿನ್ನೂ ಬದುಕಿರುವ ಸಾಕ್ಷ್ಯ
ಹಾಗೆ ಠಕ್ಕರ ಸುಳಿವೂ ಕೂಡ
ಹೂವು ತನ್ನ ಪಕಳೆಯುರುಳಿಸುವ
ಸದ್ದಿಗಾಗಿ ಕಾತರಿಸುತ್ತೇನೆ
ಏಕೆಂದರೆ ನಾನು ಕ್ಷುಲ್ಲಕ ಮನುಷ್ಯ
ನಿರ್ವಾತವೆಂದರೆ ಉಸಿರುಗಟ್ಟುತ್ತದೆ
ಸದಾ ಗಿಜಿಗುಡುವ ಪ್ರತಿಯೊಂದು
ಕ್ಷಣ-ಕಣವೂ ನನಗಾಪ್ತ
ಇನ್ನು ನನ್ನ ಸಹಮಾನವನ ಆರ್ತನಾದವೋ,
ಅಜಾನ್, ಪ್ರಾರ್ಥನಾ ಪ್ರಯೋಗಗಳನ್ನೋ
ಬೇಡವೆನ್ನುವಷ್ಟು ನಿರ್ವಾಣದಲ್ಲಿ ಬದುಕುವ
ಕಲೆಯಿನ್ನೂ ಸಿದ್ಧಿಸಿಲ್ಲ
ಅಥವಾ
ನಾನದಕ್ಕೆ ಒಗ್ಗಿಹೋಗಿರಬಹುದು
ಸಂತೆಯೊಳಗೆ ಸಂತತ್ವದ ಸುಳಿವಿರಬಹುದೆ ? ಧ್ಯಾನ ಪ್ರಾರ್ಥನೆ ಬಹಿರಂಗವಾಗಲೆ ಬೇಕೆ.ಭಾವುಕತೆಯಲ್ಲಿ ವಾಸ್ತವದ ಅರಿವು ಜಾರಬಾರದಲ್ಲವೆ. ಕವಿತೆ ವಾಸ್ತವದ ಚೂರು ,ಒಡೆದ ಬಿಂಬದ ಅಳಲು. ನಿರ್ವಾತವೆಂದರೆ ಉಸಿರುಗಟ್ಟುತ್ತದೆ ಈ ಸಾಲು ಹಿಡಿಯಾಗಿ ಕವಿತೆನ್ನು ದ್ವನಿಸುತ್ತದೆ. ಧನ್ಯವಾದಗಳು
ಧನ್ಯವಾದಗಳು ಗೆಳೆಯ
ಹಳಹಳಿಸುವ ಮನದ ನೈಜ ಭಾವ