ಪ್ರೀತಿಯ ಪ್ಯಾಲಸ್ತೀನ್ ಕುರಿತು

ಯಮುನಾ ಗಾಂವ್ಕರ್, ಕಾರವಾರ

ಈ ಕೂಸು ಪಿತೃ ಭೂಮಿಯದ್ದೋ ಮಾತೃಭೂಮಿಯದ್ದೋ
ಅಂತೂ ಕೂಗುತ್ತಿದೆ ವಿಶ್ವದುದ್ದಗಲ
ನಮ್ಮ ಮನೆ ನಮ್ಮ ಹಕ್ಕು

ಕೇವಲ ತುಂಡು ಭೂಮಿ, ಹಿಡಿಯಷ್ಟು ಜೀವಕ್ಕಾಗಿ
ದೇವದೇವನ ಪವಿತ್ರ ಭೂಮಿಯಿಂದ …
ಸಮರ ಉರಿಯಲ್ಲೇ ಅವರೂ ಕೂಗುತ್ತಿದ್ದಾರೆ…
ಝರುಸಲೇಂ-ಬೆತ್ಲೆಹೆಂನ ಕ್ರಿಸ್ತ-ಪೈಗಂಬರರಿಬ್ಬರೂ
ಪ್ಯಾಲಸ್ತೀನ್ …ಪ್ಯಾಲಸ್ತೀನ್ …. ಪಾರಿವಾಳಕ್ಕಾಗಿ….

ಯುದ್ಧಾರಂಭದಿಂದ ನಿದ್ದೆ ಮಾಡಿರಲಿಕ್ಕಿಲ್ಲ
ಅಂದಿನ ಮಗು ಇಂದಿನ ವೃದ್ಧಾಪ್ಯತನಕ
ಜೀವವಿದ್ದರೆ… ನೋಡಿದ್ದು.. ಕೇಳಿದ್ದು
ಎಲ್ಲವೂ ಶೃಂಗಸಭೆ, ವಿಶ್ವಸಂಸ್ಥೆಗಳೇ…
ಗುಣಪಡಿಸಲಾರದ ಗಾಯವೇನಲ್ಲ, ಆದರೂ..
ಹೇಳಿದ್ದು ಮಾತ್ರ ವಿಮೋಚನೆಯ ಕನಸೊಂದು ಕ್ರೂರ ಜಂತು !

ಸೂರ್ಯ ಮುಳುಗದ ನಾಡಿನ ಮಾನಸ ಪುತ್ರಿ
ಬೆಳೆಯುತ್ತಿದೆ ಆ ಅಮೇರಿಕೆಯ ಬಿಳಿಮನೆಯಲ್ಲಿ
ಜಿಯಾನ್ ಜ್ಯೂ ನಾಝಿ ಹಿಂದುತ್ವ
ಎಲ್ಲವೂ ಒಂದೇ ಅಸ್ತ್ರದಲ್ಲಿ

ಇಸ್ರೈಲ್ನಿಂದ ಶಾರೂನ್, ನ್ಯಾತಾನ್ಯಾಹೂ ತನಕ
ಅಂದು ಮರದಿಂದ ಬಿದ್ದ ಮಂಗನೀಗ ದಷ್ಟಪುಷ್ಟ
ಹೊಟ್ಟೆತುಂಬ ಬಾಂಬು, ಪಿಸ್ತೂಲು, ಮಿಸೈಲ್ ಉಗ್ರಾಣ
ಎಷ್ಟು ಛೀಮಾರಿ ಉಗಿದರೂ ತಾಗುವುದಿಲ್ಲ
ವೈಟ್ ಹೌಸ್ ಸ್ನೇಹದೊಳಗೆ ಎಲ್ಲವೂ ವೈಟ್ ವಾಶ್!
ಕೊಂದಿದ್ದಕ್ಕೆ ಲೆಕ್ಕವಿಲ್ಲ, ಸಂಚಿಗೇನೂ ಬರವಿಲ್ಲ
ಅಪಹರಣಕ್ಕೆ ವಿರಾಮವೇ ಇಲ್ಲ… ವಿಷ ವೈರಸ್ಗಳೋ ಸಹಸ್ರಾರು…

ಸಾಲು ದೀಪಗಳ ಎಣ್ಣೆ ತೀರುವ ಮುನ್ನ ಆರಿಸಿದ್ದು ಗಾಳಿಯಲ್ಲ
ಗೋಲನ್ ಬೆಟ್ಟದ ತುಂಬಾ ಗೊಬೆಲ್ಸ್ ತಂತ್ರದ್ದೆ ದಾರಿಯದು..
ನದಿಯ ದಂಡೆಗುಂಟ ಮರಳರಾಶಿ
ಅಗೆದಾಗೆಲ್ಲ,
ಸ್ವಾತಂತ್ರ್ಯ ಕನಸಿದವರ ರುಂಡಗಳದ್ದೇ ಗುಳಿಕಣ್ಣು ಬುರುಡೆ …

ಅಪರಾಧಿ ಇಸ್ರೈಲ್ ಒಪುತ್ತಿಲ್ಲ
ಆದರೂ ಪ್ಯಾಲಸ್ತೀನೀಯರು ಬದುಕು ಕಲಿಸುತ್ತಾರೆ
ರಕ್ತದ ಮಡುವಿನಲ್ಲಿ, ಕೋವಿಗುಂಡಿನ ಸದ್ದಿನಲ್ಲಿ
ಸರಳು ಬಲೆಗಳ ಮುಳ್ಳಿನಲ್ಲಿ, ಸಮರಾಸ್ತ್ರಗಳ ಮಳೆಯಲ್ಲಿ
ಹೆಣಗಳ ರಾಶಿಯಲ್ಲೂ ಎಲ್ಲೆಲ್ಲೂ ಬದುಕು ಕಲಿಸುತ್ತಾರೆ ಅವರು
ಗಡಿಗುರುತುಗಳ ತೊರೆದು
ಇಸ್ರೈಲ್ ಅಮೇರಿಕಾ ಸಮ್ಮಿಳನದಲ್ಲೂ ಹಾದು ಹೋಗುತ್ತಾರೆ
ಅರಾಫತ್ ಚೆಗೆವಾರ ಮಂಡೇಲಾ ಹೊಚಿಮ್ಹಿನ್ ಜೊತೆ
ಒಂದಾಗುತ್ತಾರೆ