ಕಾಫಿ ಮತ್ತು ಕಾಂತಾ ಸಂಹಿತೆ

ಶ್ರೀನಿಧಿ ಡಿ ಎಸ್

ತುಂತುರು ಹನಿಗಳು

ನಿನ್ನೆಯ ಅಚಾತುರ್ಯಕ್ಕೆ ಬೇಸರಿಸಬೇಡ

ಏನೋ ನಡೆದು ಹೋಯಿತು

ಬಿಡು, ಅಂತವಳು ಮಾಡಿದಾಗ

ಸಮಾಧಾನ

ಸುಮ್ಮನೆ ಸದ್ದು ಮಾಡಿದ್ದು ಕಾಫಿ ಟೇಬಲ್ಲು

ಗಾಜಿನ ಮೇಲೆ ಕಂಡ ಪ್ರತಿಫಲನದಲ್ಲೂ ಇಲ್ಲ

ತೇವಭಾವ

ಮರೆಯಬೇಕು ಎನ್ನುವುದಿಲ್ಲ ಆದರೆ

ನೆನಪಿಟ್ಟುಕೊಂಡು

ಚುಚ್ಚಿಕೊಳ್ಳುವುದೂ ಬೇಡ

ಎಂದಾಗ ಏನೋ ಹೇಳಲು ಹೋದ

ಮಾತು ಕಾಫಿಯ

ಹನಿಯೊಡನೆ ಸಿಕ್ಕಿ ಕೆಳಗೆಲ್ಲೋ

ಬಿದ್ದು ಕಳೆದು ಹೋಯಿತು

ಹುಡುಕಲು ಹೋಗಲಿಲ್ಲ

ಸಮಾಧಾನ ಮಾಡಿಕೋ

ರಿಲ್ಯಾಕ್ಸ್,

ಅಂತಂದು

ಹೆಗಲು ಸವರಿ ಎದ್ದು ಹೋದಾಗ

ವೈಟರ್ ಮಧ್ಯ ಬಂದಿದ್ದು ಯೋಗಾಯೋಗ

ಹೊರಗೆ ಬಿಸಿಲು ಜೋರಿದೆ.

ಅವಳ ಕಾಫಿಯ ಕಪ್ಪು ಮೂಡಿಸಿದ್ದ

ಹಸಿವರ್ತುಲ ನಿಧಾನ

ನಿಧಾನವಾಗಿ ಒಣಗುತ್ತಿದೆ

ತೃಷೆಯೂ.