ಹಳೆಯ ಸಾಲಗಾರರಿಂದ ತಪ್ಪಿಸಿಕೊಳ್ಳುವ ಸಲುವಾಗಿ ಕುಪ್ಪಣ್ಣಭಟ್ಟರು ಹೊಸ ಸಾಲ ಮಾಡುತ್ತಲೇ ಇದ್ದಾರೆ. ಇಂಥ ಹೊತ್ತಲ್ಲೇ ಶ್ರೀನರಸಿಂಹದೇವರ ಮಠದ ವಟುಗಳು ಅರ್ಥಾತ್ ಮಠದ ಏಜೆಂಟರು ಮಠದ ಬಾಕಿ ವಸೂಲಿಗಾಗಿ ಕುಪ್ಪಣ್ಣಭಟ್ಟರ ಬೆನ್ನುಬಿದ್ದಿದ್ದಾರೆ. ಅಪ್ಪಣ್ಣಭಟ್ಟರ ಗೇಲಿ, ಕಮ್ತಿ, ಮತ್ತಿತರ ಸಾಲಗಾರರಿಂದ ಪಾರಾಗುವ ದಾರಿಗಳಿಗಾಗಿ ಹುಡುಕಿ ಸೋತಿರುವ ಕುಪ್ಪಣ್ಣಭಟ್ಟರ ಮೇಲೆ ಈ ಮಠದ ಏಜೆಂಟರ ಕಾಟ ದಿನದಿಂದ ದಿನಕ್ಕೆ ತೀವ್ರವಾಗುತ್ತಲೇ ಹೋಗುತ್ತದೆ. ‘ನೀವೆಂಥಾ ಬ್ರಾಹ್ಮಣ? ಮಠಕ್ಕೆ ದ್ರೋಹ ಮಾಡಲು ನಾಚಿಕೆಯಾಗುವುದಿಲ್ಲವೇ? ಮಠದ ಬಾಕಿ ತೀರಿಸುವಿರೋ ಇಲ್ಲ ನಿಮ್ಮ ಮನೆ ಜಪ್ತಿಮಾಡಿಕೊಳ್ಳುವುದೋ? ಮಠದ, ಸ್ವಾಮೀಜಿಗಳ ಶಾಪ ನಿಮ್ಮನ್ನು ತಟ್ಟದೇ ಬಿಡುವುದಿಲ್ಲ…’ ಇತ್ಯಾದಿ ಮಾತುಗಳಿಂದ ಮಠದ ಏಜೆಂಟರು ಈಗಾಗಲೇ ಅರ್ಧ ಹೆಣವಾಗಿರುವ ಕುಪ್ಪಣ್ಣಭಟ್ಟರನ್ನು ಪೂರ್ತಿ ಹೆಣವಾಗಿಸಲು ನೋಡುತ್ತಾರೆ.

‘ಮಠದ ಸ್ವಾಮಿಗಳನ್ನು ದಿವ್ಯಜ್ಞಾನಿಗಳು ಎಂದು ತಿಳಿದಿದ್ದೆ! ಕುಪ್ಪಣ್ಣಭಟ್ಟನ ಇವತ್ತಿನ ಸ್ಥಿತಿ ನಿಮ್ಮ ಸ್ವಾಮೀಜಿಯ ದಿವ್ಯಜ್ಞಾನದ ಕಣ್ಣಿಗೆ ಇನ್ನು ಬಿದ್ದಿಲ್ಲವೇ? ನನ್ನ ಪರಿಸ್ಥಿತಿ ನೋಡಿಯೂ ಮಠದ ಬಾಕಿ ಹಣಕ್ಕಾಗಿ ನಿಮ್ಮನ್ನು ಅವರು ಕಳಿಸುತ್ತಾರೆಂದರೆ…’ ಕುಪ್ಪಣ್ಣಭಟ್ಟರ ಮಾತು ನಿಲ್ಲುತ್ತದೆ. ಮಠದ ಏಜೆಂಟರು ಕುಪ್ಪಣ್ಣಭಟ್ಟರನ್ನು ಕೊಲ್ಲುವಂತೆ ನೋಡಿ ಅಲ್ಲಿಂದ ದುರುದುರು ನಡೆದುಹೋಗುತ್ತಾರೆ.

ಮತ್ತೆ ಅಪ್ಪಣ್ಣಭಟ್ಟರ ವ್ಯಂಗ್ಯ, ಕಮ್ತಿ ತನ್ನ ಸಾಲಕ್ಕಾಗಿ ಕುಪ್ಪಣ್ಣಭಟ್ಟರ ಮನೆಮುಂದೆ ಬಂದು ಚಂಡಿಮಾಡುವುದು ಮುಂದುವರೆಯುತ್ತದೆ. ಕುಪ್ಪಣ್ಣಭಟ್ಟರು ಮಾತ್ರ ‘ಮೌನಿ’.

‘ಮಠದ ಸ್ವಾಮಿಗಳನ್ನು ದಿವ್ಯಜ್ಞಾನಿಗಳು ಎಂದು ತಿಳಿದಿದ್ದೆ!’ ಎಂಬ ಕುಪ್ಪಣ್ಣಭಟ್ಟರ ಮಾತುಗಳು ಯಾಕೋ ಗೊತ್ತಿಲ್ಲ ನನ್ನೊಳಗೆ ತೀವ್ರವಾಗಿ ಕೂತುಬಿಟ್ಟಿದೆ.