ದೀಪಾವಳಿ ಹಬ್ಬ

– ಅಕ್ಕಿಮಂಗಲ ಮಂಜುನಾಥ

ತಪ್ಪದೆ ಬರುವುದು ದೀವಳಿ ಹಬ್ಬ
ಗಡ ಗಡ ನಡಗುವ ಚಳಿಯಲ್ಲಿ
ಬಯಲಲಿ ಪಯಿರು ತೆನೆಯಲಿ ಹಕ್ಕಿ
ಹಾಡಿವೆ ಸೋನೆ ಮಳೆಯಲ್ಲಿ
 
ಹಬ್ಬಕೆ ಬೇಕು ಹೊಸ ಹೊಸ ಬಟ್ಟೆ
ತೊಟ್ಟು ಮೆರೆಯಲಿಕ್ಕೆ;
ಬಗೆ ಬಗೆ ತಿಂಡಿ ತಿನುವೆವು ದಂಡಿ
ಲೋಕ ಮರೆಯಲಿಕ್ಕೆ

ನೆಂಟರು ಬರಲಿ ಉಡುಗೊರೆ ತರಲಿ
ಭಾವನು ತಪ್ಪದೆ ಬರಲಿ
ಕೈಯಲಿ ಹಿಡಿದಿಹ ಚೀಲದ ತುಂಬಾ
ಪಟಾಕಿ ಸರಗಳೇ ಇರಲಿ
 
ಎಳೆಯರು ನಾವು ಗೆಳೆಯರ ಕೂಡಿ
ಬಿಂಕದಿ ನಡೆಯುವೆವು
ಮತಾಪು ಪೆಟ್ಟಿ ಸುರ್ ಸುರ್ ಬತ್ತಿ
ಪಟಾಕಿ ಸಿಡಿಸುವೆವು